Մայիսի 2-ին Գորիսի Սդղի գյոլ կոչվող տարածքում Սյունիքի մարզպետ Սուրիկ Խաչատրյանի որդու` Տիգրան Խաչատրյանի մասնակցությամբ հերթական ծեծկռտուքից տեսողությունը կորցրած Հարություն Զաքարյանը հինգերորդ անգամ վիրահատության է ենթարկվել։ Այդ մասին «Առաջին լրատվական»-ի հետ զրույցում ասաց Հարութ Զաքարյանի ընկերը՝ Գորիսի քաղաքապետի նախկին թեկնածու, Գորիսի «ԳԱՄՄԱ» ընկերության տնօրեն, գործարար Տիգրան Կարապետյանը:
Վիրահատությունը կատարել է ԱՄՆ-ից Մոսկվա ժամանած բժիշկը։ Ըստ նրա՝ վիրահատությունն անցել է լավ, բայց տեսողության վերականգնման որևէ հնարավորություն այս պահին չկա, պարզապես սկսված բորբոքային պրոցեսները կանխվել են։ Այսօր արդեն վիրակապը կհանեն, և կնշանակվի հաջորդ վիրահատության օրը՝ հավանաբոր հոկտեմբերի վերջին նորից Հարութ Զաքարյանի աչքը կվիրահատեն։
Արդյոք այս անգամ Տիգրան Խաչատրյանը իսկապե՞ս պատասխանատվության կենթարկվի և կարճ ժամանակ անց նորից չի՞ լինի ազատության մեջ: Տիգրան Կարապետյանն ասաց, որ վստահ է, որ մայիսի 2-ին Սդղի գյոլի բոլոր մեղավորները արժանի պատիժ են ստանալու։
«Չեմ ուզում նախաքննության մեջ խորանալ, քանի որ Զաքարյաններն ունեն պաշտպան, և իրավական հարցերին պատասխանում է պաշտպան Լևոն Սահակյանը։ Միայն կասեմ իմ կարծիքը՝ մեղավորները արժանի պատիժ կստանան։ Այս անգամ այդ վստահությունը կա»,- ասաց նա։
Մամուլում շրջանառվող լուրերի կապակցությամբ, թե այս օրերին Սուրիկ Խաչատրյանը փորձում է Զաքարյանների ընտանիքին փոխհատուցման առաջարկ անել, Տիգրան Կարապետյանը նշեց. «Զաքարյանները բարեգործություն չեն փնտրում, Զաքարյաններն արդարություն են փնտրում»:
Մեր ունեցած տեղեկություններով՝ երեկվանից նրանք, ովքեր Սղդի գյոլի ծեծկռտուքին վկա են եղել, Խաչատրյանների կողմից ճնշումների են ենթարկվում, բարեկամներ են միջնորդում, փորձում են վկաներին համոզել՝ հետ վերցնել ցուցմունքը, որ մնա միայն Հարություն Զաքարյանի ցուցմունքը։ «Վատ է լինելու, մեկ է՝ ինքը հետ է գալու»,- ասել են Խաչատրյանները վկաներին։
Հիշեցնենք, որ օրերս Սդղի գյոլ կոչվող տարածքում Հարություն և Մուշեղ Զաքարյան եղբայրների նկատմամբ կիրառված բռնությունների դեպքի առթիվ քննվող քրեական գործով ձերբակալվել է Սյունիքի մարզպետի որդին՝ Տիգրան Խաչատրյանը։
Տիգրան Խաչատրյանը կասկածվում է ՀՀ քրեական օրենսգրքի 112-րդ հոդվածի առաջին մասով նախատեսված արարք, այն է` Հարություն Զաքարյանին ծանր մարմնական վնաս պատճառելու համար:
