Շենգավիթ վարչական շրջանի ընդհանուր իրավասության դատարանի վարույթում է Արթուր Ս.-ի և Հովհաննես Գ.-ի գործի դատական քննությունը:
24-ամյա Արթուրը և 27-ամյա Հովհաննեսը մեղադրվում են խուլիգանության համար՝ ՀՀ քրեական օրենսգրքի 258 հոդվածի 3-րդ մասի 1-ին կետով:
Ըստ մեղադրանքի՝ Արթուր Ս.-ն ու Հովհաննես Գ.-ն 2014 թվականի հոկտեմբերի 26-ին, գիշերվա ժամը 1-ի սահմաններում այցելել են Նորագավիթ թաղամասում գործող «Միրաժ» գիշերային ակումբ, որտեղ ոգելից խմիչքի ազդեցության տակ իրենց սեղանի մոտ են հրավիրել պարուհիներին: Վերջիններիս համապատասխան գումար վճարելու փոխարեն Արթուրը քաշքշել է նրանց ներքնաշորերից, պահանջել է մերկանալ և, ստանալով բացասական պատասխան, հայհոյել է նրանց:
Այնուհետև երիտասարդները վիճել են ակումբի մատուցողուհու հետ և շուրջ երկու ժամ հայհոյանքներ են տվել մատուցողուհու հասցեին ու անհասցե: Հովհաննեսը մատուցողուհու հետևից բաժակ է նետել ու կոտրել:
Բարձրացված աղմուկի պատճառով ակումբի հաճախորդները հեռացել են ակումբից, խանգարվել է ակումբի բնականոն աշխատանքը:
Այնուհետև Արթուր Ս.-ն, որ բավարար գումար չունենալու պատճառով նախապես ակումբում գրավադրել էր իր բջջային հեռախոսը, ակումբի մենեջերին, ապա սեփականատիրոջ որդուն՝ Գարիկ Խ.-ին առաջարկել է գրավ հեռախոսը փոխարինել ժամացույցով:
Մերժում ստանալով՝ նա վիճել է վերջինիս հետ, Հովհաննեսի հետ միասին հայհոյել է նրան, բռնություն է գործադրել ու բռունցքով հարվածել է Գարիկի դեմքին, սեղմել է պարանոցը՝ նրա առողջությանը պատճառելով կարճատև քայքայումով թեթև վնաս: Հովհաննեսն իր հերթին ձեռքերով ու ոտքերով է հարվածներ հասցրել Գարիկի մարմնին:
Արթուրի և Հովհաննեսի խափանման միջոցը ստորագրությունն է չհեռանալու մասին:
