Մարդու իրավունքների պաշտպան Կարեն Անդրեասյանը կառավարության նիստից հետո անդրադարձավ հունիսի 23-ին Բաղրամյան պողոտայում ոստիկանության անօրինական գործողությունների առնչությամբ հարուցված գործի քննության ընթացքին։
Լրագրողների հարցին, թե ինչ է արձանագրել ընթացքից, Անդրեասյանն ասաց. «Մենք մեր բոլոր տեսակետներն ու խնդիրները հստակ հայտարարությամբ հայտնել ենք, ավելացնելու ոչինչ չունենք, գործընթացը դեռ շարունակվում է։ Ճիշտ է, կարելի էր ակնկալել խիստ պատիժներ առանձին անձանց վերաբերյալ, բայց, ինչպես գիտեք, արդեն կան որոշակի պատասխանատվության ենթարկված ոստիկաններ։ Իրենց կողմից հիմա գործընթացը շարունակվում է, մենք հետևոմ ենք, այդ իմաստով մենք մեր աշխատանքը ավարտել ենք, մեր լիազորությունները ավարտվում են այն պահին, երբ կայացվում է խախտման որոշում, և այն հրապարակվում է»։
Ինչ վերաբերում է ակցիայի մասնակիցներին պատժելու պահանջին, Պաշտպանն ասաց. «Տրամաբանական է պահանջը, արդարացի է, թե ոչ՝ դատարանը կորոշի, մեր լիազորությունները սպառված են։ Եթե տուժած քաղաքացիները, լրագրողները իրենց գույքային իրավունքների վերականգնման համար տեսնում են, որ չի բավարարում ոստիկանության որոշումները, կարող են բողոքարկել դատական կարգով, մենք պարտավորեցնելու իրավասություն չունենք»։
Լրագրողի դիտարկմանը՝ տեղյա՞կ է, թե ինչ միջոցներից է փոխհատուցվելու լրագրողներին հասցված տեխնիկական վնասը, Կ. Անդրեասյանն ասաց. «Տարբեր կարող են լինել, կարող է պետական մարմինը փոխհատուցել, հետո իր իսկ աշխատողից պահանջել. այդպիսի պրակտիկա դեռ չկա, հուսամ՝ կլինի, որովհետև մենք աստիճանաբար դառնում ենք ավելի գրագետ, ամուր իրավաբանական տրամաբանությամբ հասարակություն… Ժամանակին, երբ մենք մի հայտարարություն էինք անում, պետական մարմինը չէր ընդունում, հիմա սկսում է պատասխանատվության ենթարակել։ Թեև սա չի բավականացնում, բայց զարգացման նշան է, որ մեր հասարակությունը հասունանում է»։
ՄԻՊ-ը ընդգծեց, թե չգիտի՝ որտեղից է ոստիկանությունը վճարելու հասցված գույքի փոխհատուցումը, սակայն վստահեցրեց, թե իր հետաքրքրության տիրույթում է, և եթե պետական բյուջեի հաշվին լինի, ու այդ միջոցները չվերականգնվեն, ուրեմն խնդրահարույց է»։
Նա նաև վստահեցրեց, որ հետևելու է Սուրիկ Խաչատրյանի որդու ձերբակալության գործի ընթացքին։
Ավելին՝ տեսանյութում։