Շիմպանզեների խմբերը Ուգանդայում ձեռք են բերել տարօրինակ սովորություն: Վերջին տարիներին նրանք պարբերաբար սկսել են ուտել մեծ քանակությամբ կավ, որը, մարդաբանների կարծիքով, նրանց օգնում է օրգանիզմը մաքրել թույներից և մակաբույծներից` այն հագեցնելով միկրոտարրերով և հանքանյութերով, այդ մասին հրապարակված է PLoS One ամսագրում, հայտնում է RIA Novosti-ն:
Կավի քիմիական կազմությունը հետազոտելով՝ մարդաբանները եկել են այն եզրակացության, որ այդպես շիմպանզեն կոմպենսացնում է նատրիումի, կալցիումի, մագնեզիումի, ֆոսֆորի, կալիումի և այլ միկրոտարրերի պակասը, որից նրանց զրկել են տեղի բնակիչները:
Վերջին տարիներին, կապված վայրի բնության մեջ մարդկանց ներթափանցման հետ, նկատվում են կապիկների վարքի փոփոխություններ: Օրինակ՝ վերջերս հայտնաբերել են, որ Գվինեայի շիմպանզեները սովորել են տեղի բնակիչներից գողանալ գինի և խմել: Իսկ նրանց ցեղակիցները՝ Ուգանդայից, սովորել են ճիշտ անցնել ճանապարհը` նայելով աջ և ձախ:
