Թուրքիայի նախագահ Ռեջեփ Թայիփ Էրդողանը հայտարարել է, որ թուրքական օբյեկտների վրա քուրդ զինյալների հարձակումների պատճառով երկիրը չի կարող շարունակել քրդերի հետ խաղաղ կարգավորման գործընթացը, հայտնում է BBC-ն:
Վերջին ժամանակներում Թուրքիայում տեղի ունեցավ մի քանի հարձակում, այդ թվում՝ հուլիսի 20-ին առավելապես քրդերով բնակեցված Սուրուչ քաղաքի ահաբեկչությունը, ինչը իրականացրել են ԴԱԻՇ-ի զինյալները:
Դա օգտագործելով որպես առիթ՝ Թուրքիան հանդես է գալիս Սիրիայի հետ սահմանում բուֆերային գոտի ստեղծելու օգտին: Դա Թուրքիային թույլ կտա հարվածներ հասցնել ոչ միայն ԴԱԻՇ-ի զինյալներին, այլև «Քուրդիստանի աշխատավորական կուսակցություն» (ՔԱԿ) արգելված անջատողական կազմակերպության դիրքերին:
Թուրքիան պնդում է, որ ՔԱԿ-ը և ԴԱԻՇ-ը երկուսն էլ ահաբեկչական կազմակերպություններ են:
Եթե առաջ նա ԱՄՆ-ի գլխավորած միջազգային կոալիցիայում առանց ոգևորության հանդես էր գալիս որպես գործընկեր, ապա ներկայումս ուղարկում է ավիացիա և ամերիկյան կործանիչներին տրամադրում իր բազաները: Թուրքիայի հարավային սահմանում Սիրիայի և Իրաքի հետ լարվածությունը գնալով աճում է:
1984 թվականից սկսած ՔԱԿ-ի և կառավարական ուժերի հակամարտության հետևանքով զոհվել է մոտ 40 հազար մարդ: Վերջերս թուրքական ուժերի և քուրդ զինյալների միջև տեղի ունեցան մի շարք բախումներ: Թուրքական ոստիկանությունը շարունակում է ԴԱԻՇ-ի և ՔԱԿ-ի ենթադրյալ անդամների ձերբակալությունները, որոնց թիվը արդեն հասել է 1000 մարդու:
Չնայած Թուրքիան պնդում է, որ սիրիական քրդերը գտնվում են «ընթացիկ պատերազմական ջանքերից դուրս», սակայն վերլուծաբանները ասում են, որ ԴԱԻՇ-ի դեմ պայքարում Թուրքիայի կողմից ցուցաբերվող վճռականությունը կապված է քրդերի մարտունակության վերահսկման հետ:
Այժմ, երբ կարելի է հարվածներ հասցնել և՛ ԴԱԻՇ-ին, և՛ ՔԱԿ-ին, Թուրքիան պատրաստ է մտնելու ԴԱԻՇ-ի դեմ պայքարելու գործընթացի մեջ: