7days.ru-ի փոխանցմամբ՝ Ուիթնի Հյուսթոնի դստեր՝ Բոբի Կրիստինա Բրաունի մահվանից հետո արդեն իսկ վեճեր են սկսվել, թե ում են բաժին հասնելու մորից ժառանգած նրա միլիոնները։ 2012 թվականին Ուիթնի Հյուսթոնի ողբերգական մահվանից հետո գլխավոր ժառանգորդ էր ճանաչվել Բոբին՝ համաձայն երգչուհու թողած կտակի։
Նա ստացել էր մոտ 20 միլիոն դոլար, որոնք Ուիթնին վաստակել էր իր կարիերայի ընթացքում։ Իրականում Բոբիի համար մատչելի էր դարձել այդ գումարի միայն 10 տոկոսը, այն էլ ոչ միանգամից՝ 2014 թվականի մարտին, երբ նա նշեց իր 21-ամյակը։ Գումարի հաջորդ մասը պետք է նրան բաժին հասներ 25 տարեկանում։ Սակայն աղջիկը դժբախտաբար մահացավ 22 տարեկանում։ Այնպես որ, ներկայումս ըստ ամենայնի գումարը բաշխվելու է նրա մոր կամքին համապատասխան։
Ուիթնիի կտակի համաձայն՝ եթե նրա դուստրը չապրի մինչև 25 տարեկան (տարօրինակ է, որ Հյուսթոնը չէր բացառել նման հնարավորությունը), ապա նրա միլիոնները բաժին կհասնեն ազգականներին։ Խոսքն առաջին հերթին Ուիթնիի մոր՝ Սիսիի ու երկու եղբայրների՝ Մայքլի ու Գերիի մասին է։ Հյուսթոնի նախկին ամուսին Բոբի Բրաունը նույնպես հավակնություններ է ներկայացրել Հյուսթոնի փողերի նկատմամբ, սակայն ամենայն հավանականությամբ նա կմնա ձեռնունայն։ Ակնկալվում է, որ Բոբին ամեն դեպքում փորձելու է ապացուցել իր իրավունքները։