Այսօր կառավարությունում հրավիրված էր հակակոռուպցիոն խորհրդի անդրանիկ նիստը, որին հրավիրված էին նաև հասարակական սեկտորի ներկայացուցիչներ, որոնցից շատերը չկարողացան զսպել իրենց հիացմունքը և Հովիկ Աբրահամյանին հայտնեցին, թե շատ հրաշալի գաղափար է հակակոռուպցիոն խորհրդի ստեղծումը:
Խորհրդի նիստին ներկա էր նաև «Թրանսփարենսի ինթերնեյշնլ» հակակոռուպցիոն կենտրոնի նախագահ Վարուժան Հոկտանյանը, ով նիստի ավարտից հետո անդրադառնալով վարչապետի այս նախաձեռնությանը՝ նկատեց, որ դեռ վաղ է ասել, թե ինչ արդյունք կտա այս խորհուրդը:
«Առաջին լրատվական»-ը Հոկտանյանից հետաքրքրվեց՝ խոշոր բիզնեսմենները, ինչպիսիք են վարչապետ Հովիկ Աբրահամյանը, ֆինանսների նախարար Գագիկ Խաչատրյանը, կարո՞ղ են պայքարել կոռուպցիայի դեմ, մեր զրուցակիցը նկատեց. «Խնդիրը միայն դա չի, և ոչ այնքան դա: Կան ավելի լուրջ խնդիրներ: Մասնավորապես, քաղաքական կամքի խնդիր կա: Եթե քաղաքական կամք կա, ապա խնդիրները կլուծվեն, բայց ես առայժմ քաղաքական կամք չեմ տեսնում»,- ասաց Հոկտանյանը:
Վերջինիս խոսքով՝ կառավարության կողմից մշակված հակակոռուպցիոն ռազմավարությունը շատ քիչ խնդիրներ է լուծում: Անհրաժեշտ է ավելի լայն ոլորտներ վերցնել:
Ըստ Հոկտանյանի՝ կոռուպցիայի դեմ պայքարի միակ իրական ճանապարհը իշխանափոխությունն է:
Առավել մանրամասն՝ տեսանյութում։