Թուրքական Haberler.com կայքի փոխանցմամբ՝ քրդամետ «Ժողովուրդների դեմոկրատական» կուսակցության (ԺԴԿ) համանախագահ Սելահաթթին Դեմիրթաշը հայտարարել է, որ ԺԴԿ-ի 80 պատգամավորները դիմելու են խորհրդարանին՝ պատգամավորական անձեռնմխելիությունը վերացնելու համար։
Դեմիրթաշը հայտարարել է, որ իրենք մեղք չեն գործել, ներման հետ կապված ակնկալիքներ չունեն, և որ իրենց միակ մեղքը հունիսի 7-ին Թուրքիայում անցկացված խորհրդարանական ընտրությունների արդյունքներով քվեների 13 տոկոս հավաքելն է. «Եթե դուք վախենալու բան չունեք, ապա եկեք միասին վերացնենք պատգամավորական անձեռնմխելիությունը»։
Նա «Քրդական հարցի» կարգավորման գործընթացում առաջընթացի բացակայության համար մեղադրել է Թուրքիայի իշխանություններին՝ նշելով, որ նրանք թուրք հասարակությանը խոստացան խաղաղության գործընթաց, ապա հայտարարեցին, որ երկրում չկա «Քրդական հարց»։
Դեմիրթաշի խոսքերով՝ Թուրքիայի նախագահ Ռեջեփ Էրդողանը հունիսի 7-ի ընտրություններից հետո հեղաշրջում է անցկացրել, քանի որ չէր հաջողվել հասնել միակուսակցական կառավարության ստեղծման։ Դեմիրթաշն ընդգծել է, որ կարգավորմանը մնացել էր 1 շաբաթ, սակայն իշխանությունները հրաժարվեցին դրանից։
«40-ամյա խնդրի լուծմանը մնացել էր մեկ շաբաթ։ Ինչո՞ւ հրաժարվեցիք։ Արդեն իսկ հայտնի էր, որ լեռների կազմակերպության (PKK) առաջնորդը մեկ շաբաթ անց կայանալիք կոնգրեսում պետք է հանդես գար զենքերը վայր դնելու կոչով։ Մենք շատ գոհ էինք։ Դուք ինչո՞ւ էիք խուճապի մեջ։ Հենց նախագահն (Էրդողան) է խոչընդոտել PKK-ի զինաթափմանը։ Ողջ գործընթացն ավարտվեց»,- նշել է նա։
Հիշեցնենք. ավելի վաղ Թուրքիայի նախագահ Ռեջեփ Էրդողանը հայտարարել էր, որ ներկա պայմաններում անհնար է («Քրդական հարցի») կարգավորման գործընթացի շարունակումը։
