Թուրքական Dünya Bülteni լրատվական կենտրոնի փոխանցմամբ՝ Թուրքիայում ահաբեկչական հռչակված ու արգելված «Քրդստանի աշխատավորական» կուսակցության (PKK) զինյալները երկրի հարավարևելյան Հաքքարի նահանգի Շեմդինլի շրջանում ծանր վիրավորել են հետևակի ենթասպա, 27-ամյա Զիյա Սարփքայային։ Միջադեպը գրանցվել է ժամը 11:30-ի մոտ։ Ենթասպայի կյանքին դեռ վտանգ է սպառնում։
PKK-ի զինյալները նաև պայթեցրել են Մուշ-Քուլփ ավտոճանապարհի վրա գտնվող երկու կամուրջներ, որոնք միմյանց էին կապում Մուշի ու Դիարբեքիրի նահանգները։ Պայթյուններից հետո PKK-ի զինյալները հեռացել են դեպքի վայրից, իսկ Ժանդարմերիայի զինծառայողները սկսել են փնտրել նրանց։
PKK-ականները Բաթմանի նահանգի Դատվանի շրջանում կեսգիշերին ավտոմեքենայով մոտեցել են տեղի անվտանգության ծառայության ոստիկանության շենքին և այրել են նրա շրջակայքն ու հեռացել այնտեղից։ Իզմիրի նահանգի Նարլըդերե շրջանի զորանոցի ուղղությամբ անհայտ անձի կամ անձանց կողմից ատրճանակից կրակոցներ են արձակվել։ Միջադեպը գրանցվել է ժամը 01:00-ի մոտ։
Հիշեցնենք, որ սրանից առաջ էլ հաղորդվել էր, որ PKK-ի զինյալները Աղրը (Արարատ) նահանգում պայթեցրել են Իրանից եկող գազատարը։
Մերսինի նահանգում անհայտ անձը կամ անձինք կրակել են ոստիկանության զրահապատ մեքենայի վրա, իսկ Էրզրումի նահանգի Թեքմանի շրջանում PKK-ի զինյակները բախվել են պարեկություն կատարող Ժանդարմերիայի զինծառայողների հետ։ Ընդգծվում է, որ բախման հետևանքով սպանվել է 3 PKK-ական։
Մարդինի նահանգի Դարգեչիթ շրջանի ղեկավարության շենքը վաղ առավոտյան հրթիռակոծվել ու գնդակոծվել է PKK-ի զինյալների կողմից։ Շենքում մարդիկ չեն եղել, և զոհեր ու վիրավորներ չկան։