Այսօր ԱԺ-ում «Նաիրիտ գործարան» ՓԲԸ-ի հետագա շահագործման, տեխնիկական և ֆինանսական կենսունակության ուսումնասիրության վերաբերյալ քննարկմանը ԱԺ ՀՀԿ խմբակցության պատգամավոր Մարգարիտ Եսայանը նշեց, որ ՀԲ-ի ներկայացրած փաստաթղթով՝ 2010-ին «Նաիրիտի» սեփականատերը լքել է այն։
«Ուզում եմ իմանալ՝ Դուք տեղեկություն ունե՞ք՝ արդյոք ինչպե՞ս է կնքվել պայմանագիրը, որ սեփականատերը լքել է, գնացել՝ այդքան պարտքը թողնելով ձեռնարկությանը։ Մենք չունե՞նք որևէ լիազորություն սեփականատիրոջը բերման ենթարկելու»,-ասաց նա՝ հավելելով, որ կառավարությունը ուղիներ է փնտրում այն վերագործարկելու համար։
Էներգետիկայի և բնական պաշարների նախարար Երվանդ Զախարյանը նշեց, որ սեփականատիրոջ հետ պայմանագիր ստորագրվել է ամրագրված է եղել, որ համապատասխան ներդրումների չապահովման դեպքում ուղղակի վերանայվում են պայմանագրի պահանջները։ Այս չորս տարիների ընթացքում, նախարարի խոսքով, աշխատել են վնասով և ներդրում չեն արել։
Մարգարիտ Եսայանը նշեց, որ այս պատասխանն իր համար հասկանալի չէ։