Թուրքական Anadolu լրատվական գործակալության փոխանցմամբ՝ Թուրքիայի նախագահ Ռեջեփ Էրդողանը Չինաստան մեկնելուց առաջ Անկարայի «Էսենբողա» օդանավակայանում լրագրողների հետ զրույցում անդրադարձել է ԴԱԻՇ-ի ու PKK-ի շուրջ վերջին զարգացումներին:
«ՆԱՏՕ-ն այսօր արտակարգ նիստ է գումարելու Թուրքիայի հարցով։ Ես հավատում եմ, որ ՆԱՏՕ-ն պատրաստ կլինի ձեռնարկել իրենից կախված ամեն բան։ Եթե ՆԱՏՕ-ի անդամ երկրներից մեկը ենթարկվում է հարձակման, ապա այդ կազմակերպությունը ամեն տիպի աջակցություն է ցուցաբերում։ Այսօր հարձակման է ենթարկվել Թուրքիան, և նա օգտվել ու օգտվելու է ինքնապաշտպանության իրավունքից։ Այստեղ մենք օգտվում ենք բոլոր իրավունքներից՝ հիմնված միջազգային իրավունքի վրա, և շարունակելու ենք օգտվել։ Մենք խոսում ենք այն մասին, որ ՆԱՏՕ-ն ցանկացած ժամանակ կարող է հարկադրված լինել միջոցներ ձեռնարկել։ Այդպիսով մենք ՆԱՏՕ-ից պահանջում ենք պատրաստ լինել»,- ասել է նա։
