«Ուզում են ասել, թե աուդիտը անցկացրել են, հիմա էլ արդյունքներն են հաղորդում: Ուզում են ասել՝ տեսեք՝ աշխարհը դեմ է «Նաիրիտի» վերագործարկմանը: Ո՛չ, այդպես չէ»,- նշեցին ԱԺ դիմաց բողոքի ակցիա իրականացնող նաիրիտցիները:
Բողոքի ակցիաները համակարգող խմբի անդամ Անուշ Հարությունյանն ասաց, որ ԱԺ լսումները ձևական բնույթ են կրում, ինչպես նաև աուդիտը, որը, ըստ էության, պատվիրված է կողմնակալ տեսակետ ներկայացնելու համար: Առանց հիմնավորման այնտեղ նշված է՝ «Նաիրիտը» պետք է սնանկ ճանաչվի: «Նաիրիտի» մասնագետները արդեն ներկայացրել են, թե «Նաիրիտը» ինչպես կարող է աշխատել: «Նաիրիտի» արտադրանքը մրցունակ ու որակյալ է և շուկայում մեծ պահանջարկ ունի»,- ասաց նա:
«Առաջին լրատվական»-ի հետ զրույցում նաիրիտցիները նշեցին, որ զարմանում են՝ ինչպե՞ս կարող է նույն ընկերությունը եզրակացություն հայտնել, որ «Նաիրիտը» պետք է աշխատի, երկու տարի անց էլ առանց հիմնավորման ներկայացնել, թե «Նաիրիտը» չի կարող վերագործարկվել:
«Մենակ միջազգային ընկերությունը չէ, իշխանություններն էլ են շահագրգռված, որ «Նաիրիտը» չվերագործարկվի, շուկայից միտումնավոր դուրս են թողնում: «Նաիրիտը» կվերագործարկվի միայն այն ժամանակ, երբ իշխանությունը փոխվի՝ նախարարից մինչև վարչապետ ու նախագահ»,- եզրափակեցին նաիրիտցիները:
