«ՀՀ Կառավարությունը դիմեց Համաշխարհային բանկին, որն իր միջոցների հաշվին պատվիրեց ընդհանուր աուդիտ: Համաշխարհային բանկը ուսումնասիրությունների արդյունքում ներկայացրել է իրենց մոտ ձևավորված կարծիքը։ Իրենց առաջարկությունները բոլորովին հիմք չեն կառավարության կողմից կայացվելիք որոշման համար։
Կառավարությունն է վերջնական որոշում կայացնելու։ Իսկ կառավարությունն առանց ԱԺ-ի նման որոշում չի կարող կայացնել»,- այսօր ԱԺ-ում «Նաիրիտ գործարան» ՓԲԸ-ի հետագա շահագործման, տեխնիկական և ֆինանսական կենսունակության ուսումնասիրության վերաբերյալ քննարկմանն ասաց Էներգետիկայի և բնական պաշարների նախարար Երվանդ Զախարյանը։
Նախարարը նշեց, որ իշխանությունների և կառավարության դիրքորոշումն այսօր գործարանի վերագործարկման համար ուղիներ փնտրելն է։
«Պետք է հնարավորություն ստեղծել ներդրողների համար կատարել համապատասխան ներդրումներ՝ գործարանների վերագործարկման նպատակով»,-ասաց նա՝ հավելելով, որ գործարանի չվերագործարկումը իր հետ բերում է սարսափելի մեծ ծախսեր, որին այսօր կառավարությունը պատրաստ չէ։
«Սա տրիկոտաժի ֆաբրիկա չէ կամ կաթի գործարան չէ, սա քիմիական գործարան է՝ իր բոլոր բարդություններով, անվտանգության համակարգով, և իրենից լուրջ պատասխանատվություն է ներկայացնում անգամ սնանկացման պրոցեսում»,-ասաց Երվանդ Զախարյանը։