Ավելի վաղ տեղեկացրել էինք, որ «Կոնտինենտտեքս» ՓԲԸ-ն, որը կարի արտադրամաս էր, Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանի՝ հունիսի 8-ի վճռով սնանկ է ճանաչվել:
ՀՀ ոստիկանության 100 տոկոս մասնակցությամբ այս ընկերությունը ժամանակին մասնակցում էր պետական գնումներին: Սակայն 2009-2013 թվականների ընթացքում էապես նվազել են ընկերության հիմնական գծով արտադրանքի իրացման ծավալները, և 2012 թվականի տարեկան հաշվետվության համաձայն՝ ընկերության վնասը կազմել է 55,2 մլն դրամ:
Մենք նաև բազմիցս լուսաբանել ենք կառավարության շենքի դիմաց՝ արտադրամասի աշխատակիցների կազմակերպած բողոքի ակցիան, ովքեր ամիսներ շարունակ չէին ստացել իրենց աշխատավարձերը։
Այսօր, ահա, արտադրամասի շենքը քանդվում է: Տեղում աշխատող բանվորը, որը չցանկացավ նկարահանվել՝ ասաց, որ իրենց այդտեղ քաղաքապետարանն է ուղարկել: Մեր տեղեկություններով՝ արտադրամասի փոխարեն կառուցվելու է էլիտար բնակելի շենք:
Քաղաքապետարանի լրատվության և հասարակայնության հետ կապերի պատասխանատու Արթուր Գևորգյանը, մինչդեռ, տեղեկությունը չհաստատեց՝ ասելով, որ ինքը նման տեղեկություն չունի, աշխատանքային օրը մոտեցել է ավարտին, և որևէ մեկից ճշտել չի կարող: