Ինչպես հայտնի է, այսօր մեղադրանք առաջադրվեց Սյունիքի մարզպետ Սուրիկ Խաչատրյանի որդուն՝ Տիգրան Խաչատրյանին, Գորիսի Սդղի գյոլ կոչվող տարածքում մայիսի 2-ին տեղի ունեցած վիճաբանության ժամանակ Հարություն Զաքարյանի նկատմամբ` բռնություն գործադրելու համար՝ առողջությանը պատճառելով ծանր մարմնական վնաս: Տիգրան Խաչատրյանին մեղադրանք է առաջադրվել ՀՀ քրեական օրենսգրքի 112-րդ հոդվածի առաջին մասով (Դիտավորությամբ առողջությանը ծանր վնաս պատճառելը):
Ըստ Քննչական կոմիտեի տարածած հաղորդագրության՝ նախաքննության ընթացքում ձեռնարկված քննչական և դատավարական գործողությունների արդյունքում ապացույցներ են ձեռք բերվել առ այն, որ Տ.Խաչատրյանը Գորիսի «Սդղի գյոլ» կոչվող տարածքում մայիսի 2-ին տեղի ունեցած վիճաբանության ժամանակ բռնություն է գործադրել Հարություն Զաքարյանի նկատմամբ` վերջինիս առողջությանը պատճառելով ծանր մարմնական վնաս:
Նշենք, որ Տիգրան Խաչատրյանը ձերբակալվեց այն բանից հետո, երբ հարցաքննվեց մինչ այդ Մոսկվայում գտնվող Հարություն Զաքարյանը: Մինչ նրա հարցաքննությունը գործը քննվում էր միայն եղբոր՝ Մուշեղ Զաքարյանի մասով:
Նկատենք, որ մայիսի 2-ի դեպքից հետո և՛ Սուրիկ Խաչատրյանը, և՛ նրա խորհրդականը՝ գնդապետ Վոլոդյա Հովհաննիսյանը, ջանք չէին խնայում հավաստիացնելու, որ Տիգրան Խաչատրյանը կապ չունի այդ ծեծկռտուքի հետ: Նա դեպքի օրը Երևանում է եղել և ֆիզիկապես չէր կարող մասնակից լինել կատարվածին:
Մարզպետի խորհրդական Վոլոդյա Հովհաննիսյանն «Առաջին լրատվական»-ի հետ զրույցում նշեց, որ ինքը պնդում է, որ Տիգրան Խաչատրյանը մասնակից չի եղել վիճաբանությանը: «Ես հիմա էլ եմ ասում, որ ինքը ծեծին չի մասնակցել»,- ասաց Հովհաննիսյանը՝ հավելելով. «Ես գտնում եմ, որ Տիգրան Խաչատրյանին մեղադրանք առաջադրվել է չակերտավոր տուժող կողմի սուտ ցուցմունքների արդյունքում: Նրանց տված ցուցմունքները սուտ են և ընդամենը մի կողմի կարծիքն են, իսկ դատարանը առաջնորդվում է երկու կողմի համադիր ցուցմունքների արդյունքում»:
