«Ազգային ժողովում «Նաիրիտ»-ի հարցով լսումներ կազմակերպելը ընդամենը ֆիկտիվ քայլ է, որով կառավարությունն ամեն ինչ անում է ցույց տալու համար, որ վերագործարկման հնարավորություններ չկան»,-«Առաջին լրատվական»-ի հետ զրույցում ասաց գործարանի նախկին մամուլի խոսնակ Անուշ Հարությունյանը:
Հիշեցնենք, որ վաղը ԱԺ արտահերթ լսումներ են կազմակերպվելու «Նաիրիտ գործարան» ՓԲԸ-ի հետագա շահագործման, տեխնիկական և ֆինանսական կենսունակության ուսումնասիրությունների վերաբերյալ:
Նաիրիտցիները հրավիրված չեն քննարկմանը, բայց քանի որ նրանք ի սկզբանե հայտարարել էին, որ գործարանը պետք է վերագործարկվի, վաղը՝ ժամը 11-ին, լսումներին զուգահեռ, ԱԺ-ի մոտ բողոքի ակցիա են կազմակերպելու:
«Նաիրիտցիները երբեք հետ չեն կանգնի վերագործարկման պահանջից: Թող տպավորություն չստեղծվի, թե աշխատավարձերը ստանալուց հետո մեր պահանջները ավարտվում են: Աշխատավարձ ստացել է ընդամենը 400 մարդ, իսկ 1700-1800 մարդ դեռ աշխատավարձ չի ստացել: Բացի դրանից՝ մենք մի քանի անգամ ռեալ ծրագրեր ենք ներկայացրել՝ 57 միլիոն արժեքով: Այնպես որ «Նաիրիտ»-ի վերագործարկումը շատ իրատեսական է»,- նկատեց Անուշ Հարությունյանը:
Ինչ վերաբերում է ամիսներ առաջ Համաշխարհային բանկի կողմից «Նաիրիտ»-ում անցկացված աուդիտին, որը նշանակվել էր վարչապետ Հովիկ Աբրահամյանի կողմից, և հենց այդ աուդիտը պետք է պարզեր գործարանի վերագործարկման հնարավորութունները, Անուշ Հարությունյանի խոսքով, խայտառակություն է:
Մեր զրուցակցի խոսքով՝ աուդիտի եզրակացության մեջ բառ անգամ չկա վերագործարկման հնարավորության մասին: «Աուդիտի այդ եզրակացությունը սկզբից մինչև վերջ այն մասին է, թե ինչպես է պետք սնանկացնել «Նաիրիտ»-ը: ՀԲ-ի այդ ներկայացուցիչը եկել էր մեր կառավարությանը սովորեցնելու սնանկացման գործընթացը: Այն դեպքում, երբ այդ մարդուն կանչել էին, որ տեսներ, թե ոնց պետք է աշխատեցնել «Նաիրիտ»-ը»,-ասաց Հարությունյանը՝ հավելելով, որ տարօրինակ է, երբ ՀԲ-ն երեք անգամ աուդիտ է իրականացնում գործարանում, ընդ որում՝ երկու անգամը շատ կոնկրետ նպատակով (գործարանը «Ռոսնեֆտ»-ին և «Իտերա»-ին վաճառելու ակնկալիքով) և միայն երրորդ աուդիտ-ի ժամանակ է խոսում սնանկացման մասին:
«Այստեղից միայն մեկ եզրակացություն կարելի է անել, որ շատ ուղղորդված, պատվիրված աուդիտ էր վերջինը, որի ժամանակ մասնագետները նույնիսկ գործարան չեն մտել, ի՞նչ աուդիտի մասին է խոսքը: Այնպես որ այս ամենը ապացուցում է, որ կառավարությունը հակված է «Նաիրիտ»-ը փակելու առանց հիմնավորումների՝ հիմնվելով ՀԲ-ի աուդիտի եզրակացության վրա, որը, ես պնդում եմ, որ ըստ էության, չի իրականացվել»,-եզրափակեց նախկին խոսնակը: