Ռումինիայի Դումբրավեն քաղաքում հուլիսի 24-26-ին անցկացվել է Դումբրավենի Դասական երաժշտության ազգային փառատոնի 3-րդ թողարկումը:
ՀՀ ԱԳՆ մամուլի ծառայությունից հայտնում են, որ Դումբրավենի քաղաքապետարանը և Ռումինիայի Հայոց միության Դումբրավենի մասնաճյուղը` Ռումինիայում ՀՀ դեսպան Համլետ Գասպարյանի հովանու ներքո, Տրանսիլվանիայի «հայկական» քաղաքում համախմբել են դասական երաժշտարվեստի բարձրակարգ խմբերի, անվանի արվեստագետների և մտավորականների:
Փառատոնի շրջանակներում դեսպան Գասպարյանն ապակենտրոնացված մակարդակով կապերը աշխուժացնելու շուրջ խորհրդակցություններ է ունեցել Դումբրավենի քաղաքապետ Ջորջետա Իրիմիեի հետ` վերջինիս փոխանցելով Նոյեմբերյանի քաղաքապետ Վանուշ Ամիրաղյանի շնորհավորական ուղերձը:
Փառատոնի շրջանակներում 300-ամյա հայ կաթողիկե Սբ Եղիսաբեթ տաճարում հանդես են եկել «Վիոլոչելիսիմո» թավջութակահարների խումբը, «Կախարդական ֆլեյտա» նախագիծը, որը միավորել է դաշնակահար Հորիա Միհայիլին և ֆլեյտահար Իոն Բոգդան Շտեֆանեսկուին, Կլուժ-Նապոկայի ազգային օպերայի Անաթոլիս վոկալ խումբը: Ծրագրի մեջ ընդգրկված են եղել նաև հայ կոմպոզիտորների գործեր:
Հուլիսի 25-ին Ապաֆի ամրոցում` Տրանսիլվանիայի Հայոց թանգարանում, բացվել են Ռուբեն Գալիչյանի «Հայացք Հայաստանի պատմությանը քարտեզագրության միջոցով» ցուցահանդեսը, ինչպես նաև ռումին ժամանակակից նկարիչներ Հորեա Կուչերզանի և Լեվենտե Ցատլոսի աշխատանքների ցուցահանդեսը:
Միջոցառումներին ողջույնի և գնահատանքի խոսքերով են հանդես եկել դեսպան Համլետ Գասպարյանը, Դումբրավենի քաղաքապետ Ջորջետա Իրիմիեն, կազմակերպիչներից՝ դոկտոր Վասիլե Հաբորը և Բուխարեստի գեղարվեստի համալսարանի պրոֆեսոր Գեորգե Անգելը:
