Առաջիկայում միջազգային 5 ամենահայտնի խորհրդատվական ընկերությւոններից մեկը ուսումնասիրություններ կսկսի Հանրային ծառայությունները կարգավորող հանձնաժողովում՝ պարզելու, թե որքանով էր հիմնավորված հունիսի 17-ին էլեկտրաէներգիայի սակագնի վերանայման մասին հանձնաժողովի որոշումը:
Նման որոշում կայացվեց այսօր ՀԾԿՀ նիստում՝ հաշվի առնելով տնտեսական քաղաքականության պատասխանատուների հետ խորհրդակցությունների ժամանակ Սերժ Սարգսյանի հայտարարությունը, նպատակ ունենալով բարձրացնել հանձնաժողովի գործունեության նկատմամբ հանրության վստահությունը:
Նշենք, որ սա բացարձակապես կապ չունի ՀԷՑ-ում աուդիտ իրականացնելու վերաբերյալ որոշման հետ:
Հանձնաժողովի անդամ Սամվել Արաբաջյանը նիստի ավարտից հետո լրագրողների հետ զրույցում ասաց, որ այս խորհրդատվական ընկերության հիմնական նպատակը պետք է լինի հիմնավորված պատասխաններ ստանալ երկու կարևորագույն հարցերի վերաբերյալ՝ ինչքանո՞վ էր հիմնավորված հոսանքի սակագնի բարձրացումը, ինչպես նաև սակագնի բարձրացման դեպքում ինչպիսի՞ վտանգներ են սպառնում էներգետիկ համակարգին:
Խորհրդատուն նախ պետք է իրականացնի էներգետիկ համակարգի գործառնական վերլուծություն, արտադրողից մինչև սպառող գնագոյացման շղթայի ուսումնասիրություն և մի շարք այլ հարցեր:
Միջազգային խորհրդատվական ընկերությանը վճարելու է կառավարությունը՝ իր պահուստային ֆոնդից, իսկ թե որքան գումար՝ դեռ հայտնի չէ:
Լրագրողները Արաբաջյանից հետաքրքրվեցին, թե խորհրդատավական ընկերության ուսումնասիրություններից հետո հնարավո՞ր է սակագնի վերանայում, վերջինս պատասխանեց, թե տեսականորեն ոչինչ չպետք է բացառել:
Առավել մանրամասն՝ տեսանյութում: