Ինչպես հայտնի է, այսօր առավոտյան «Առաջին լրատվական»-ը հրապարակեց հաղորդագրություն, որ մինչև օգոստոսի 10-ը կսկսվի Գյումրիում հունվարի 12-ին դաժանաբար սպանդի ենթարկված Ավետիսյանների ընտանիքի գործով դատավարությունը (ամբաստանյալ` ռուս ժամկետային զինծառայող Վալերի Պերմյակով): Արդեն հայտնի է, որ առաջին դատական նիստը կկայանա ռուսական 102-րդ ռազմաբազայում, որտեղ ընթանում են որոշ նորոգչական աշխատանքներ, և որի ընթացքում ամբաստանյալ Վ. Պերմյակովը կդատվի զենքով զորամասի տարածքը լքելու և դասալքության համար, ապա արդեն նրան կհանձնեն հայկական կողմին, և դատավարությունը կշարունակվի Շիրակի մարզի ընդհանուր իրավասության առաջին ատյանի դատարանում: Հայտնի է նաև, որ ամբաստանյալն իր պատիժը կկրի ՀՀ տարածքում:
Լուրը կայծակնային արագությամբ տարածվեց նաև հանրապետության երկրորդ քաղաքում:
Ինչպե՞ս են գնահատում այս լուրը գյումրեցիները, ի՞նչ մթնոլորտ է այս պահին Գյումրիում, և գործին առնչվող այլ հարցերի շուրջ «Առաջին լրատվական»-ը զրուցել է գյումրեցի մտավորական, քաղաքագետ Գագիկ Համբարյանի հետ:
«Նախ ասեմ, որ շատ լավ է, որ Պերմյակովի գործը վերջապես փոխանցվեց մեր կողմին, և կլինի արդեն դատավարությունը: Թեև անկեղծ լինելով՝ պիտի նաև արձանագրեմ, որ բավական ուշացած էր այս փոխանցումը, որը կատարվեց օրեր առաջ (նկատի ունի Ավետիսյանների գործի փոխանցումը հայակական կողմին.- «Առաջին լրատվական»):
Շատ լավ է նաև այն, որ դատավարությունը կիրականացվի մեր դատարանի կողմից: Սա առաջին հերթին մեր հաղթանակն է, մեր քաղաքի, մեր երկրի ու հասարակության հաղթանակը:
Ըստ ամենայնի, Մոսկվան այս վեց ամիսների ձգձգումով նախ ճշգրիտ ինֆորմացիա ստացավ մեր երկրում տիրող իրավիճակի ու հասարակության մեջ տիրող տրամադրությունների մասին ու նաև հասկացավ, թե պնդաճակատությունն ինչի կարող է հանգեցնել: Իհարկե, կարող եմ ասել, որ գնահատեց նաև իր դիվանագիտական սխալները, որոնք թույլ տվեց սկզբում իր՝ արդեն նշածս պնդաճակատությամբ:
Անկեղծ ասած, մեծ հավատ չունեմ, որ այս գործը մինչև վերջ կբացահայտվի: Ե՛վ ես, և՛ գյումրեցիները, և՛ մեր ամբողջ հասարակությունը բազմաթիվ անպատասխան հարցեր ունի, թեկուզև միայն այն, թե ինչպե՞ս է երկու ամսվա տասնութամյա երիտասարդը կողմնորոշվել քաղաքում, ինչո՞ւ է ընտրել հենց այդ տունը, կամ ինչպե՞ս կարող էր այդ երիտասարդը սպանել յոթ հոգու՝ տան երեք սենյակներում, ու ոչ մեկը ոչինչ չլսեր՝ ո՛չ հարևանները, ո՛չ մեկը: Հասկանո՞ւմ եք՝ նման բան չի լինում»,- ասաց նա:
Քաղաքագետը կարծում է, որ սպասվելիք դատավարությունը կընթանա բավականին ծանր, քանի որ յոթ մարդու կյանք է խլված, ու թեկուզև էմոցիոնալ պոռթկումներից խուսափելն անհնարին կլինի: Սակայն նաև կարևորում է, որ անհրաժեշտ է ամեն բան անել պատշաճ կարգուկանոն հաստատելու համար: «Իհարկե, պետք է նաև շատ զգույշ լինենք ու զգոն և թույլ չտանք, որ ոմանք իրենց քաղաքական շահերը հետապնդեն այս դատավարությամբ»,- նկատեց քաղաքագետը:
Պարոն Համբարյանը լիահույս է, որ հայ իրավաբաններին կհաջողվի ի վերջո կոնկրետ հարցադրումներով պարզել, թե Վալերի Պերմյակովը եղել է միայնա՞կ, թե՞ այս դեպքում գործել է կոնկրետ խումբ: Քաղաքագետը նաև կարծում է, որ այս դատավարությունն ու այն, որ Պերմյակովն իր պատիժը կրելու է Հայաստանում, կարող է նորմալացնող դերակատարություն ունենալ հայ հասարակության մեջ իր` ռուսների հանդեպ ունեցած ավանդական վերաբերմունքի խաթարված ընթացքի վերականգնման ուղղությամբ, թեև սրանով հանդերձ արձանագրում է, որ Գյումրիում ավելի սթափ են մտածում ու գնահատում իրավիճակը, և չի կարելի ասել, թե քաղաքում այժմ հակառուսական տրամադրություններ կան:
«Գյումրեցիները ավելի սթափ են մտածում, մեր ժողովրդի բառերով ասած` «պաղ (սառը) գլխով», ու հասկանում են, որ Գյումրին այսօր, ցավոք, իր գոյությունը պահպանում է նաև ռուսական բազայի հաշվին, ռուս` անհամեմատ ավելի բարեկեցիկ ու գնողունակ զինվորականների ու վերջիններիս ընտանիքների հաշվին: Հարցրեք խանութներից, սրճարաններից ու սպասարկման այլ օբյեկտներից: Այո, ցավով եմ սա արձանագրում, քանի որ մեր երկրի իշխանությոններն անցնող տարիներին չկարողացան սոցիալ-տնտեսական այն պայմաններն ապահովել, որ այս հարցի մասին չխոսեինք էլ, բայց, ավաղ, ունենք այն, ինչ ունենք: Թեև սա չի նշանակում, թե գյումրեցին կուլ գնացող է: Գյումրեցին ստրկամիտ չէ ու տեղն եկած ժամանակ կարող է իր բռունցքի ուժը ցույց տալ, ինչն ապացուցեց արդեն: Այնպես որ հիմա բոլորս էլ սպասում ենք, որ առաջին հերթին մեզ հուզող հարցերի պատասխանները ստանանք առաջիկա դատավարությունից»,- ամփոփեց գյումրեցի քաղաքագետը: