«ՆԱՏՕ-ի հետ Հայաստանի հարաբերությունները կարո՞ղ են դիտարկվել լուրջ հեռանկարային խողովակ Հայաստանի անվտանգության քաղաքականությունների դիվերսիֆիկացման առումով։ Թե՛ ՆԱՏՕ-ի անդամ երկրները, թե՛ Արևմուտքը տարբեր պաշտոնյաների շուրթերով երբեք չեն դադարում կրկնել, որ Հայաստանն այն բացառիկ երկրներից է, որ գտնվելով ՀԱՊԿ-ում՝ բավականին դինամիկ զարգացող հարաբերություններ ունի ՆԱՏՕ-ի հետ, որը նույնպես կոլեկտիվ անվտանգության համակարգ է»,- ասաց ՄԱՀՀԻ հետազոտական ծրագրերի ղեկավար Ստյոպա Սաֆարյանը իր «Հայաստան-ՆԱՏՕ գործընկերության հեռանկարները» զեկույցում։
Նա նշեց, որ Հայաստանն ունի ՆԱՏՕ-ի հետ հարաբերությունները խորացնելու ազատության այդ աստիճանը. «Պատճառը կհամարենք Մոսկվայի թույլտվությունը թե պարզապես այն, որ Մոսկվան ինքն էլ այլընտրանք չունի, քան ՆԱՏՕ-ի հետ հարաբերությունների որոշակի մակարդակ պահպանելը, այնուամենայնիվ, անկախ բուն պատճառից, Հայաստանի համար ճանապարհ է բացվում՝ խորացնելու ՆԱՏՕ-ի հետ իր հարաբերությունները»,- հավելեց Ստյոպա Սաֆարյանը։
Նա նշեց, որ փորձը ցույց է տալիս, որ Հայաստանի քաղաքական կշիռը իր ռազմավարական դաշնակցի մոտ ավելի է բարձրանում, երբ Հայաստանը շատ ավելի ինքնաբավ քաղաքականություն է վարում, և արտաքին քաղաքականության առումով մեծապես բարձրանում է ՆԱՏՕ-Հայաստան հարաբերությունների կարևորությունը։
