Հայաստանի Հանրապետության արդարադատության նախարարության պաշտոնական կայքում հրապարկվել է Սահմանադրության 1-7 լրամշակված գլուխները։
Փոփոխությունների համաձայն՝ Հայաստանն անցում է կատարում խորհրդարանական կառավարման համակարգի, իսկ նախագահն ընտրվում է 7 տարի ժամկետով:
Սահմանադրական բարեփոխումների ընդդիմախոսները բազմիցս նշել են, որ բացի այն հանգամանքից, որ այս սահմանադրական բարեփոխումներն արվում են իշխանությունն ամրապնդելու համար, նաև մեծ խնդիր են առաջացնելու Եվրասիական տնտեսական միության շրջանակներում: Մասնավորապես այն կոնտեքստում, որ Պուտինի, Նազարբաևի և Լուկաշենկոյի հետ մեկ սեղանի շուրջ նախագահի մակարդակից ցածր անձ, ասենք՝ վարչապետ կամ ազգային ժողովի նախագահ, չի կարող նստել:
Մինչդեռ «Առաջին լրատվական»-ի հետ զրույցում ՌԴ առաջին կարգի պետական խորհրդական, REX գործակալության ղեկավար և ռուսաստանցի վերլուծաբան Մոդեստ Կոլերովն ասաց, որ Հայաստանում սահմանադրական բարեփոխումներ անցկացնելը Հայաստանի իրավունքն է, և Մոսկվան դրա հետ ոչ մի կապ չունի։
Հարցին, թե ԵՏՄ շրջանակներում այս փոփոխությունները կարող են որևէ խնդիր առաջացնել, Կոլերովը պատասխանեց. «Կառավարման համակարգը Եվրասիական տնտեսական միության շրջանակներում որևէ դերակատարություն չունի: Եթե փոփոխությունների համաձայն՝ երկրը սկսի փաստացիորեն ղեկավարել վարչապետը, նշանակում է Եվրասիական տնտեսական միության գագաթաժողովներին և հանդիպումներին կմասնկացի վարչապետը՝ և վերջ, որևէ այլ բան չկա»,-ասաց Կոլերովը՝ ևս մեկ անգամ վստահեցնելով, որ Մոսկվան որևէ խնդիր չի տեսնում այն հարցում, որ ԵՏՄ գագաթաժողովներին նախագահի փոխարեն մասնակցի վարչապետը:
Հետաքրքրվեցինք նաև, թե իր կարծիքով ինչու են Հայաստանին անհրաժեշտ սահմանադրական բարեփոխումները, ինչու են իշխանությունները որոշել գնալ այդ ճանապարհով, Կոլերովը հակիրճ պատասխանեց. «Թե ինչու է դա անհրաժեշտ Հայաստանին, հարցն անձամբ Հայաստանինն է, իսկ թե ինչու է դա անում իշխանությունը, միանգամայն հասկանալի է, որպեսզի ընտրությունը կատարվի 7 կուսակցություններից, այլ ոչ թե այն 7՝ առաջին անձանց կողմից, որոնք մասնակցում են նախագահական ընտրություններին: Եվ դա հասկանալի է՝ չնայած, նորից նշեմ, դա Հայաստանի ներքին խնդիրն է»: