Ադրբեջանական Day.az կայքի փոխանցմամբ, ԵԽ խորհրդի նախկին նախագահ և Չեխիայի նախկին վարչապետ Միրեկ Տոպոլանեկը, մասնակցելով Բաքվում կայացած Կասպյան նավթագազային առևտրա-տրանսպորտային V կոնֆերանսին, ընդգծել է Կասպյան տարածաշրջանի կարևորությունը Եվրոպայի համար.
«Գնալով կաճի Կասպյան ավազանի ածխաջրածինների դերը Եվրոպայի էներգամատակարարման հարցում: Հյուսիսային Աֆրիկայում տիրող անկայուն իրավիճակը էլ ավելի է մեծացնում Կասպյան ու Միջերկրածովյան տարածաշրջանների կարևորությունը Եվրոպայի էներգամատակարարման համար:
Չնայած ներկայումս ծավալուն աշխատանքներ են ընթանում էներգիայի այլընտրանքային աղբյուրների զարգացման ուղղությամբ` այնուամենայնիվ, տեսանելի ապագայում ածխաջրածինները կշարունակեն հանդիսանալ էներգիայի հիմնական աղբյուրը:
Կասպյան ռեսուրսների ստացման հարցում Եվրոպայի գլխավոր մրցակիցը Չինաստանն է: Սակայն Եվրոպան տիրապետում է բազմաթիվ գործիքների Կասպյան տարածաշրջանի երկրների՝ ածխաջրածինների առաքման հարցում դեպի եվրոպական ուղղություն հակվելու համար:
Մասնավորապես, Ադրբեջանի պարագայում դա կարող է լինել ոչ միայն սեփական ածխաջրածինների արտահանման երթուղիների բազմատեսակությունը (դիվերսիֆիկացումը), այլև սեփական արտահանումից ստացվող եկամուտների կրկնակի ավելացումը:
Ինչ վերաբերում է Nabucco գազատարին, ապա դրա առաջին փուլի համար բավական կլինի ադրբեջանական «Շահ Դենիզ-2»-ում և թուրքմենական գազահանքավայրերում արդյունահանվելիք գազը:
Եթե Եվրոպան ցանկանում է հաջողությամբ իրագործել «Հարավային միջանցք» նախագիծը, ապա պետք է սերտորեն համագործակցի Կասպյան տարածաշրջանի և միջինասիական երկրների հետ, ինչպես նաև հատուկ ռազմավարություն մշակի այդ երկրներից յուրաքանչյուրի նկատմամբ: Եվրոպան հանդիսանալու է կասպյան ածխաջրածինների ամենամեծ սպառողը»:
Հիշեցնենք, որ ԵՄ-ի համար առաջնահերթ համարվող «Հարավային միջանցք» նախագծի շրջանակներում են գտնվում Nabucco, Տրանսադրիատիկ (TAP), ITGI (Թուրքիա-Հունաստան-Իտալիա), «Սպիտակ հոսք» (Վրաստան (Բաթում)-Ուկրաինա) գազատարները:
