Ֆուտբոլի Միկրոնեզիայի հավաքականի գլխավոր մարզիչ Սթեն Ֆոսթերը հուսով է, որ ազգային ընտրանին կընդգրկվի ՖԻՖԱ-ի կազմում, որից հետո կստանա կազմակերպության աջակցությունը։
Մարզիչը նման հայտարարություն արել է այն բանից հետո, երբ թիմը Խաղաղօվկիանոսյան խաղերում 3-րդ պարտությունն է կրել՝ Վանուատուի հավաքականին զիջելով 46։0 հաշվով։ Մինչ այդ թիմը 30։0 և 38։0 հաշիվներով պարտվել էր համապատասխանաբար Թաիթիի ու Ֆիջիի հավաքականներին։
«Տղաները խաղում էին տղամարդկանց դեմ։ Հուսով եմ՝ ՖԻՖԱ-ի ներկայացուցիչները հաջորդ շաբաթ կժամանեն մեզ մոտ, և կընդգրկվենք Ասիական կոնֆեդերացիայի կազմում։
Դրա արդյունքում կստանանք տեխնիկական օգնություն և այլ առավելություններ։ Նաև ուրախությունս պետք է հայտնեմ, որ մեզ հրավիրել են մասնակցելու Խաղաղօվկիանոսյան հաջորդ խաղերին։ Մտավախություն ունեինք, որ նման պարտություններից հետո հրավեր չենք ստանա»։