Էրեբունի և Նուբարաշեն վարչական շրջանների ընդհանուր իրավասության դատարանում Արտուշ Գաբրիելյանի նախագահությամբ սկսվեց Գոհար Մարտիրոսյանի գործի դատական քննությունը:
Հանցավոր արարքը, որի համար մեղադրվում է Գոհարը, կատարվել է ուղիղ մեկ տարի առաջ: Հանցանքի կատարման, ինչպես նաև դատական այս նիստի օրն ամբաստանյալի ծննդյան օրն է:
Գոհար Մարտիրոսյանը մեղադրվում է տուժողի առողջությանը դիտավորությամբ ծանր վնաս հասցնելու համար՝ ՀՀ քրեական օրենսգրքի 112 հոդվածի 1-ին մասով: Նրա խափանման միջոցը ստորագրությունն է չհեռանալու մասին:
Հանցանքը կատարելու պահին Գոհարը նշել է իր 21-ամյակը:
Ըստ մեղադրանքի՝ 2014 թվականի հուլիսի 6-ին, ժամը 21-ի սահմաններում Երևանի Ջրաշենի 1 հասցեում գտնվող զրուցարանում, խնջույքի ընթացքում առաջացած վիճաբանության ժամանակ Գոհար Մարտիրոսյանը սուր կտրող-ծակող գործիքով հարվածել է Խաչիկ Գ.-ի որովայնի ձախ հատվածին ու նրա առողջությանը պատճառել է ծանր վնաս:
Դատական նիստից առաջ Գոհարը ասաց, թե տուժողը նույնպես դատարան է եկել: Սակայն հետո պարզվեց, որ «տուժող» ասելով՝ Գոհարը նկատի ուներ ոչ թե գործով տուժող Խաչիկին, այլ… իր ամուսնուն:
Ամբաստանյալ Գոհարը դատարանում հայտնեց, որ փաստական ամուսնական հարաբերությունների մեջ է, ունի մեկ մանկահասակ՝ 3 ամսական երեխա:
Ուշացումով դատարան հասավ գործով տուժողը: Փոքրամարմին, վտիտ Գոհարի կողքին 57-ամյա տուժող Խաչիկը ավելի ամրակազմ էր թվում:
Նա ասաց, թե նյութական պահանջ չունի Գոհարից:
Ըստ Գոհարի՝ ինքը խառնվել է տղամարդկանց կռվին, ցանկացել է օգնել իր ամուսնուն. «4 տղամարդով նրան ծեծում էին, դե ես էլ փորձեցի ամուսնուս… պաշտպանել…»:
Հանուն ամուսնու պաշտպանության դանակի գործադրմանը դիմած Գոհարը հանցանքի կատարման պահին… հղի է եղել… Փաստորեն, նետվել է պաշտպանելու ոչ միայն ամուսնուն, այլև իր երեխայի հայրիկին…
Գոհարի փաստական ամուսինը այս գործով պարզապես վկայի կարգավիճակ ունի…
Գոհարն ասաց, որ ծնողազուրկ է, մինչև 14 տարեկանը տատիկի խնամքի տակ է մեծացել, հետո տատիկը մահացել է: Գոհարն այն ժամանակից մինչև հիմա բարեգործական հիմնադրամում է հաշվառված:
Որբ մեծացած Գոհարին տղամարդկանց կռվի ժամանակ թվացել էր, թե ամուսնուն վտանգ է սպառնում, նա դանակն առել ու նետվել էր ամուսնուն փրկելու…
Գոհարի շահերի պաշտպանը դատարանին ներկայացրեց բժշկական փաստաթուղթ, համաձայն որի՝ Գոհարի երեխան վատառողջ է…
Գոհար Մարտիրոսյանը միջնորդեց, որ գործը քննվի արագացված ընթացակարգով:
Նախաքննության ընթացքում Գոհարն իրեն մասնակիորեն է մեղավոր ճանաչել, բայց դատարանում ասաց, թե իրեն լիովին մեղավոր է ճանաչում, զղջում է կատարածի համար, նույնիսկ պատրաստ է օրենքով սահմանված ու դատարանի կողմից նշանակվող պատիժը կրել… Դա էլ՝ հանուն ամուսնու…
Մեղադրողն ու տուժողը չառարկեցին արագացված կարգ կիրառելու դեմ:
Գործի քննությունը կատարվեց արագացված կարգով:
Դատարանը Գոհարի պատիժն ու պատասխանատվությունը ծանրացնող հանգամանքներ ի հայտ չբերեց:
Նշվեցին մի շարք մեղմացնող հանգամանքներ՝ նախկինում դատված չլինելը, խնամքին վատառողջ մանկահասակ երեխա ունենալը…
Մեղադրող Ռ. Երիցյանը ժամանակ խնդրեց ճառին պատրաստվելու համար:
Դատական վիճաբանություններին դատարանը կանդրադառնա հուլիսի 9-ին:
