Բրիտանական Reuters լրատվական գործակալության փոխանցմամբ՝ Իրանի բալիստիկ հրթիռների ծրագրի հետ կապված պատժամիջոցների վերացման շուրջ տարաձայնություններն իրանական միջուկային ծրագրի շուրջ անցկացվող բանակցությունների անկյունաքարերից մեկն են: Այդ մասին գործակալությանը հայտնել է նրա աղբյուրը։
«Իրանցիները ցանկանում են, որ վերացվեն բալիստիկ հրթիռներին առնչվող պատժամիջոցները: Նրանք ասում են, որ չկա պատճառ՝ դրանք իրենց միջուկային ծրագրի հետ շաղկապելու համար: Սակայն դժվար է ընդունել այդ տեսակետը: Մենք մեր կողմից հատուկ չենք սպասում դրան (պատժամիջոցների վերացմանը)»,- հայտնել է աղբյուրը:
Իրանցի բարձրաստիճան պաշտոնյաներից մեկը լրագրողներին հայտնել է, որ Թեհրանը ցանկանում է ՄԱԿ-ի զենքի էմբարգոյի վերացում: Իրանական պատվիրակությունը չի բացառում, որ «վեցյակի» ու Իրանի միջև տարվող բանակցությունները կարող են երկարաձգվել մինչև հուլիսի 9-ի առավոտյան: