Հունգարիայի խորհրդարանն այսօր հավանություն է տվել օրինագծին, որն իրավական հիմք է ապահովում սերբական սահմանին ցանկապատ անցկացնելու համար՝ միգրացիոն քաղաքականության խստացման շրջանակում։ Այս մասին հայտնում է Reuters գործակալությունը։
Ավելի վաղ Հունգարիայի իշխանությունները հայտարարել էին, որ երկիրը չի պատրաստվում փակել Սերբիայի հետ սահմանը անօրինական ներգաղթյալների հոսքի պատճառով, սակայն պատ կկառուցի պետական սահմանի անօրինական հատման զանգվածային դեպքերի դեմ պայքարի համար։
Օրենքը նաև նախատեսում է ապաստանի տրամադրման հայտերի քննման ժամկետի կրճատում և թույլ տալիս Բուդապեշտին մերժել սիրիացի, աֆղան և իրաքցի փախստականներին, եթե նրանք Հունգարիա են ժամանել երկրներ տարանցելով, որոնք անվտանգության հետ կապված խնդիրներ չունեն։
Փախստականների հարցերվ ՄԱԿ-ի գործակալությունն արդեն մտահոգություն է հայտնել Բուդապեշտի ծրագրերի կապակցությամբ՝ նշելով, որ դրանք կարող են «ճակատագրական հետևանքներ» ունենալ փախստականների համար։