Մայիսի 2-ին Գորիսի «Սդղի գյոլ» կոչվող տարածքում Սյունիքի մարզպետ Սուրիկ Խաչատրյանի որդու և հարազատների մասնակցությամբ տեղի ունեցած ծեծկռտուքի հետևանքով տուժած Զաքարյան եղբայրների ծնողները համոզված են, որ «արդարություն կլինի, ու Սուրիկ Խաչատրյանի որդին ու նրա մերձավորները անպայման պատասխանատվության կենթարկվեն»:
Ծեծի հետևանքով տեսողությունը կորցրած Հարութ Զաքարյանի հայրը՝ Գագիկ Զաքարյանը, որը որդու հետ օրերս է վերադարձել Մոսկվայից, «Առաջին լրատվական»-ի հետ զրույցում ասաց, որ ոչ մի կասկած չունի, որ մեղավորները պատասխանատվության կենթարկվեն: «Այդ ամենի կազմակերպիչը Տիգրան Խաչատրյանն է եղել, ու նա չի կարող մնալ վկայի կարգավիճակում: Նա պատասխանատվության կենթարկվի, ու ոչ միայն նա, այլ նաև այդ բանդայի բոլոր մասնակիցները»,- ասաց հայրը:
Նրա խոսքով՝ Հարութ Զաքարյանը Մոսկվայից Հայաստան տեղափոխվելու ժամանակ առողջական խնդիրներ է ունեցել, մազանոթներ են պայթել, բայց հավանաբար մոտ օրերս կհարցաքննվի, ու նա պատրաստվում է ամեն ինչ պատմել իրավապահներին:
Հիշեցնենք, որ դեպքից հետո Հարութը մեկ անգամ է հարցաքննվել, այն էլ, հոր խոսքով, եղել է առողջական ոչ այն վիճակում, որ կարող էր հիշել ու մանրամասն պատմել կատարվածը: «Բայց հիմա ինչ կա, ինչ եղել է, այն էլ պատմելու է: Ինչո՞ւ պետք է ուրիշ բան ասի»,- ասաց Գագիկ Զաքարյանը: Մեր դիտարկմանը, թե մարզպետի խորհրդական Վոլոդյա Հովհաննիսյանը պնդում է, թե միջադեպից հետո միայն ծնողներն են բողոքում, իսկ որդիները ոչ մի բան չեն պնդում, չեն հաստատում, Զաքարյանը նկատեց. «Մարզպետի խորհրդականը ավելի լավ է՝ թող պատրաստվի, որ պատասխան տա իր ասածների համար: Նա հայտարարում է, թե Հարութի ծնողները ստում են, բայց Մոսկվայից բերված բժշկական եզրակացությունները ամեն ինչ փաստում են, ու թող պատրաստվի, որ անձամբ ինձ է պատասխան տալու: Իսկ եթե պարզվի, որ ես եմ ստում, ես պատասխան կտամ»:
Ինչ մնում է իրավապահներին, ապա Զաքարյանն ասաց, որ «իրենք իրենց գործը շատ լավ են կատարում: Ամեն ինչ կբացահայտվի»:
Ինչ վերաբերում է Հարութի առողջական վիճակին, ապա հայրն ասաց, որ Մոսկվայում շատ մեծ աշխատանք է տարվել աչքը պահպանելու համար և հիմա հավանականությունը մեծ է, որ դեռ հնարավոր կլինի պահպանել աչքը, բայց տեսողությունը վերականգնել հնարավոր չի եղել: Տեսողություն չկա:
Հիշեցնենք, որ այս դեպքի առթիվ մեղադրանք է առաջադրվել 5 անձի, այդ թվում՝ Սուրիկ Խաչատրյանի եղբորը, իսկ վերջինիս որդին գտնվում է հետախուզման մեջ: Մեղադրյալներից 4-ին մեղադրանք է առաջադրվել Քրեական օրենսգրքի 113-րդ հոդվածի 2-րդ մասի 3-րդ կետով (մի խումբ անձանց կամ կազմակերպված խմբի կողմից դիտավորությամբ առողջությանը միջին ծանրության վնաս պատճառելը), իսկ 4-րդի նկատմամբ նույն մեղադրանքով հայտարարվել է հետախուզում։ Մեղադրյալները բոլորն էլ Սուրիկ Խաչատրյանի մերձավոր շրջապատից են:
