Թուրքական Yeni Akit թերթի փոխանցմամբ՝ Թուրքիայի նախագահ Ռեջեփ Էրդողանն այսօր գումարել է կառավարության նիստ: Նիստի ժամանակ քննարկվելու են Սիրիայի հյուսիսի զարգացումները, Թուրքիայի Ազգային անվտանգության խորհրդի վերջին նիստի օրակարգում տեղ գտած թեմաները, հունիսի 7-ին Թուրքիայում անցկացված խորհրդարանական ընտրությունների արդյունքները:
Էրդողանը հրաժեշտ է տալու կառավարության անդամներին, որոնք «Արդարություն և զարգացում» կուսակցության (ԱԶԿ) ներքին կանոնակարգի (3 ժամկետի արգելքի) պատճառով այլևս ներկայացված չեն լինելու Թուրքիայի կառավարությունում: 3 ժամկետի արգելքի տակ ընկածների թվում է նաև Թուրքիայի փոխվարչապետ, ԱԶԿ-ի հիմնադիրներից Բյուլենթ Արընչը:
Արընչն ԱԶԿ-ի անդամներից մեկն էր, որ դատապարտեց Էրդողանի գործողությունները երկրի նախագահի պաշտոնում, ինչը մասնավորապես վերաբերում է «Քրդական հարցի» ժողովրդավարական կարգավորմանը: Արընչի այդ հայտարարությունը հանգեցրեց նրան, որ ԱԶԿ-ի մի շարք անդամներ դեռ մարտին պահանջեցին նրա հրաժարականը:
Հիշեցնենք, որ 1948 թվականին Բուրսայում ծնված Բյուլենթ Արընչը 2002-2007 թվականներին Թուրքիայի խորհրդարանի նախագահն էր, իսկ Թուրքիայի փոխվարչապետ է դարձել 2009 թվականի մայիսի 1-ից: Արընչը 2002 և 2007 թվականներին պատգամավոր է ընտրվել Մանիսայից, իսկ 2011 թվականին՝ Բուրսայից: Բյուլենթ Արընչը պատգամավոր է ընտրվել նաև 1995 («Բարօրություն» կուսակցություն) և 1999 թվականներին («Առաքինություն» կուսակցություն):
Ի դեպ, 2014 թվականի մայիսին ԱԶԿ-ում որոշեցին չփոխել կուսակցության ներքին կանոնակարգը, ըստ որի՝ կուսակցության անդամներն իրավունք չունեն 3 անգամից ավելի դառնալ պատգամավոր: Այժմ այդ արգելքը տարածվել է ԱԶԿ-ի ավելի քան 70 ներկայացուցչի վրա (Ռեջեփ Էրդողան, Բյուլենթ Արընչ, Բեշիր Աթալայ, Ալի Բաբաջան, Ջեմիլ Չիչեք, Նիհաթ Էրգյուն, Բինալի Յըլդըրըմ, Թաներ Յըլդըզ, Հուսեին Չելիք, Բեքիր Բոզդաղ, Սադուլահ Էրգին, Մևլութ Չավուշօղլու, Էգեմեն Բաղըշ և այլք): 2002-2011 թվականներին ընդհանուր առմամբ ԱԶԿ-ից պատգամավոր է ընտրվել 1038 մարդ: