Արաբկիր և Քանաքեռ-Զեյթուն վարչական շրջանների ընդհանուր իրավասության դատարանում Լևոն Ավետիսյանի նախագահությամբ սկսվեց Էդգար Կուչուկյանի և Յուրի Շաբոյանի գործի դատական քննությունը:
Ըստ մեղադրանքի՝ 2015 թվականի հունվարի 17-ին Երևանի Տիգրանյան 16 հասցեում՝ ճամփեզրին, Էդգար Կուչուկյանը «Ֆեյսբուքում» կատարված մեկնաբանությունների շուրջ վիճաբանել է եղբայրներ Մովսես և Յուրի Շաբոյանների ու գործով չպարզված մի խումբ անձանց հետ:
Վիճաբանության ժամանակ Էդգար Կուչուկյանը իր մոտ եղած սուր կտրող-ծակող գործիքով հարվածել է Մովսես Շաբոյանի կրծքավանդակի շրջանին, պատճառել թափանցող վնասվածք, հեմոթորաքս և տուժողի առողջությանը հասցրել է ծանր վնաս:
Յուրի Շաբոյանը, ըստ մեղադրանքի, դեպքից մի քանի օր առաջ՝ հունվարի 13-ին, ապօրինի կերպով ձեռք է բերել 9 մմ տրամաչափի գազային ատրճանակ:
Վերոհիշյալ միջադեպի ժամանակ՝ հունվարի 17-ին, ժամը 19-ն անց 30-ի սահմաններում Յուրի Շաբոյանը գազային ատրճանակն ապօրինի կրել է իր մոտ և Տիգրանյան-Ադոնց փողոցների խաչմերուկի մոտ առաջացած վիճաբանության, քաշքշուկի ժամանակ, այն բանից հետո, երբ դանակի հարված է ստացել, գոտկատեղից հանել է գազային ատրճանակը ու 3 անգամ օդ է կրակել:
Այդ կրակոցներով եզրափակվել է ֆեյսբուքյան վիրավորական «քոմենթների» պատճառով ծագած պարզաբանողական կռիվը:
25-ամյա Էդգար Կուչուկյանը մեղադրվում է տուժող Մովսես Շաբոյանի առողջությանը դիտավորությամբ ծանր վնաս հասցնելու համար՝ ՀՀ քրեական օրենսգրքի 112 հոդվածի 1-ին մասով:
22-ամյա Յուրի Շաբոյանը մեղադրվում է ապօրինի զենք ձեռք բերելու, կրելու, գործադրելու համար՝ ՀՀ քրեական օրենսգրքի 235 հոդվածի 1-ին մասով:
Կալանքի տակ է միայն ամբաստանյալ Կուչուկյանը:
Յուրի Շաբոյանի խափանման միջոցը ստորագրությունն է չհեռանալու մասին:
Դատարանի դահլիճը բերնեբերան լի էր ամբաստանյալների ընկերներով:
Նույնիսկ գործով վկաներ էին ներկայացել, ինչը հազվադեպ է լինում նման գործերով հենց առաջին դատական նիստին:
Էդգար Կուչուկյանի ընկերախումբը ուղեկցողների կողմից դատարանի դահլիճ բերված ժպտադեմ Էդգարին դիմավորեց ծափահարություններով և ուրախ բացականչություններով: Ընդհանրապես դահլիճում ներկաների տրամադրությունը բարձր էր, երիտասարդները նստել էին խիտ շարքերով ու ժպտուն դեմքերով: Նույնպիսի դեմքով ամբաստանյալի տեղից նրանց էր նայում Էդգար Կուչուկյանը:
Դատարանը ճշտեց ամբաստանյալների ինքնությունը:
Էդգար Կուչուկյանը ներկայացավ որպես միջնակարգ կրթությամբ, ֆիզիկապես առողջ երիտասարդ: Նա չհիշեց, որ նախկինում դատված լինի, ասաց. «Էս առաջին անգամն ա, էլի»: Ըստ դատական տեղեկատվական համակարգի՝ Էդգարը նախկինում դատված է:
Յուրի Շաբոյանը հայտնեց, որ «բարձրակարգ» կրթություն ունի՝ ավարտել է տնտեսագիտական համալսարանը:
Ավելի ուշ Յուրիի շահերի պաշտպան Կ. Քամալյանը դատարանին ներկայացրեց իր պաշտպանյալի անձը բնութագրող փաստաթղթեր, այդ թվում՝ դպրոցը գերազանցությամբ ավարտելու մասին վկայող ատեստատի, 2014 թվականին բակալավրի կրթություն ստացած լինելու վերաբերյալ դիպլոմի պատճենները, առողջական խնդիրների պատճառով զինծառայությունը տարաժամկետելու վերաբերյալ փաստաթուղթ, դրական բնութագիր:
Ամբաստանյալները իրենց լիովին մեղավոր ճանաչեցին, ընդունեցին առաջադրված մեղադրանքը և միջնորդեցին, որ գործը քննվի արագացված ընթացակարգով:
Տուժող Մովսես Շաբոյանը, ինչպես նաև մեղադրող Մկրտչյանը չառարկեցին:
Տուժողը Էդգար Կուչուկյանին քաղհայցի պահանջ չներկայացրեց:
Գործը քննվեց արագացված ընթացակարգով, գործի հանգամանքները քննության չառնվեցին, վկաներն ու ամբաստանյալները չհարցաքննվեցին:
Դատարանն անցավ դատական վիճաբանությունների փուլին: Մեղադրողի ճառը դատարանը կունկնդրի դատարանի՝ արձակուրդից վերադառնալուց հետո՝ օգոստոսի 13-ին: