«Ոչ թալանին» քաղաքացիական նախաձեռնությունը այսօրվանից սկսեց մարզային հանդիպումները: Առաջին հանդիպումը տեղի է ունեցել Գյումրիի Թատերական հրապարակում, որտեղ անցկացվել է հանրային քննարկում:
Քննարկման նպատակը հետագա քայլերի, գործողությունների և միասնական օրակարգի մշակումն է:
Գյումրիում «Ոչ թալանին» նախաձեռնության անդամների հետ քննարկումը սկսվելուն պես՝ առաջ են եկել խնդիրներ: «Ոչ թալանին» նախաձեռնության անդամ Արթուր Քոչարյանը ներկայացնում էր իրենց հետագա քայլերը, երբ տեղից գյումրեցիներից մեկը հարց բարձրացրեց. «Հունիսի 27-ին դու որտե՞ղ էիր, ու եթե դու թողել ես Բաղրամյանը ու գնացել Ազատության հրապարակ, ուրեմն քո ասածը կեղծիք է»:
Այդ խոսքերից հետո ակտիվիստները փորձեցին լռեցնել վերջինիս: Զուգահեռաբար Գյումրիի խմբի անդամների և Երևանից եկած խմբի անդամների միջև կա տարակարծություն: «Եթե ձեր օրակարգով մենք պահել ենք Գյումրին, դուք Բաղրամյանի պոստը թողել եք ու եկել Գյումրի՝ նույն օրակարգով խոսելու. գալու իմաստը ո՞րն է»: Վիճակը մեղմեց ազատամարտիկ Գևորգ Ալիխանյանը:
«Ոչ թալանին» նախաձեռնության անդամ Մաքսիմ Սարգսյանը նախաձեռնության անունից աջակցություն հայտնեց վերջին օրերին նստացույց հայտարարած Կարեն Պետրոսյանին, ում դեմ քրեական գործ է հարուցվել, և նշեց, որ եթե անհրաժեշտ լինի՝ կօգնեն իրավաբանների հարցով:
Այս պահին քննարկումը շարունակվում է: