Հուլիսի 4-ին նշվող ԱՄՆ Անկախության օրվան նվիրված ավանդական պիկնիկ-բարբեքյուների համար ամերիկացիների ծախսերը վերջին 10 տարում մոտ 30%-ով աճել են: Rabo AgriFinance-ի հաղորդմամբ՝ այս տարի 10-հոգանոց բարբիքյուի համար մթերքների զամբյուղը կարժենա միջինը 68 դոլար՝ 30%-ով ավել, քան 10 տարի առաջ:
Նշվում է, որ անցած տարում տավարի միսը թանկացել է 7,3%-ով, կանաչ աղցանը՝ 6,2%-ով, լոլիկը՝ 6,8%-ով, հացը՝ 4,4%-ով, մարինացված վարունգը՝ 3,6%-ով, չիփսերը՝ 1,3%-ով:
Ըմպելիքները ևս թանկացել են. քաղցր գազավորված ըմպելիքը՝ 0,9%-ով, գարեջուրը՝ 0,4%-ով:
Սննդամթերքի արժեքի վրա մի շարք գործոններ են ազդում՝ այս տարի բանջարեղենը թանկացել է երկար ու ցուրտ ձմռան պատճառով, տավարի մսի գինը բարձրանում է խոշոր եղջերավոր անասունների գլխաքանակի կրճատման պատճառով՝ պահանջարկի ավելացման դեպքում:
Միաժամանակ, ամերիկացիները կարող են նաև խնայել. օրինակ՝ հավի ֆիլեն անցած 12 ամիսների ընթացքում էժանացել է 1,9%-ով, և այն տավարի մսի փոխարեն օգտագործելու դեպքում մինչև 10%-ի խնայողություն կլինի: Ամերիկյան պանիրն էժանացել է 2,2%-ով, պաղպաղակը՝ 4,4%-ով: