Georgia Online-ի փոխանցմամբ` վրաց-թուրքմենական հարաբերությունները հատկապես տրանսպորտային-տնտեսական և լոգիստիկայի ոլորտներում, անցում են կատարում կատարելապես նոր փուլի:
Թուրքմենստանի նախագահ Գուրբանգուլի Բերդիմուհամեդովի վրացական այցի արդյունքներով լրագրողների հետ զրույցում այս մասին հայտարարել է Վրաստանի նախագահի տնտեսական հարցերով խորհրդական Գեորգի Աբաշիշվիլին:
Նրա խոսքերով` ընդունվել է Վրաստանը որպես Թուրքմենստանի գլխավոր գործընկեր դիտարկելու մասին քաղաքական որոշում` կապված թուրքմենական գազը Վրաստանի տարածքով Եվրոպա հասցնելու հետ:
Աբաշիշվիլին հայտարարել է, որ Վրաստանը մեծ դեր է խաղալու ԵՄ-ին էներգապաշարներով ապահովելու տեսանկյունից. «Այդ տեսանկյունից Վրաստանն ունի մի շարք առաջարկներ, որոնցից մեկը AGRI (Azerbaijan–Georgia–Romania Interconnector) գազատարի նախագիծն է, որը նախատեսում է թուրքմենական գազը փոխադրել Եվրոպա»:
Աբաշիշվիլին հավելել է, որ վրացական կողմը Թուրքմենստանին առաջարկել է օգտագործել իր նավահանգիստները. «Վրաստանը նաև կարող է առաջարկել լոգիստիկ ծառայություններ, այդ թվում նաև Բաթումի ու Փոթիի նավահանգիստների օգտագործումը»: