Արդեն 12-րդ օրն է՝ փակ է Բաղրամյան պողոտան ընդդեմ ՀԾԿՀ-ի հունիսի 17-ի էլեկտրաէներգիայի սակագինը 7 դրամով բարձրացնելու որոշման: Փակ պողոտայի մաքրության հարցերը, ըստ ՀՀ գլխավոր վարակաբան Արա Ասոյանի, արդեն խնդրահարույց է դառնում:
Հիշեցնենք, որ նստացույցի երրորդ օրը՝ հունիսի 25-ին, Կենտրոնի մաքրությամբ զբաղվող «Սանիտեք» ընկերության աղբատար մեքենան բերվեց աղբը հեռացնելու, սակայն ցուցարարներից մի քանիսը բարձրացան մեքենայի վրա՝ ի նշան բողոքի, որից հետո ընկերությունը հրաժարվեց տարածքում աղբահանություն իրականացնել, և այդ պարտականությունը ստանձնեցին ցուցարարները: Նրանք մինչ օրս ամեն առավոտ պարտաճանաչ իրականացնում են մաքրման աշխատանքները, ապա աղբը պոլիէթիլենային տոպրակներով իջեցնում են Բաղրամայն-Սարյան խաչմերուկ, որտեղից էլ տանում է աղբատար մեքենան:
Թեև տարածք այցելող մարդիկ այնտեղի սանիտարահիգիենիկ պայմանների մասին չունեն վատ տպավորություն, սակայն ՀՀ գլխավոր վարակաբան Արա Ասոյանը և ՀՀԿ-ական պատգամավոր, ԱԺ Առողջապահության հարցերով հանձնաժողովի նախագահ Արա Բաբլոյանը նախօրեին տարածք այցելելով՝ մեզ հետ զրույցում հայտարարեցին, որ «սանիտարահիգիենիկ վիճակը վախենալու է»: Ըստ Ասոյանի՝ առկա վիճակը ամռան 40 աստիճան տապին կարող է դառնալ վարակի աղբյուր: Ասոյանն ասաց, որ տարածքից հեռանալուց հետո հարցը պատկան մարմինների հետ կքննարկի:
Երկու օր է անցել նրանց այցից ու «վախենալու վիճակի» մասին նրանց արձանագրությունից, սակայն «Սանիտեք» ընկերության մաքրման աշխատանքները չեն վերականգնվել: Արդյոք քաղաքային իշխանությունը հետևություն չի՞ արել վարակաբանի հայտարարությունից հետո: Մեր այս հարցին ի պատասխան՝ քաղաքապետարանի մամուլի ծառայությունից հայտնեցին, որ այդ հատվածի մաքրությամբ զբաղվում է «Սանիտեք» ընկերությունը, որն էլ պատասխանատու է ստեղծված իրավիճակի համար:
Ընկերությունից, սակայն, մեզ հայտնեցին, որ Արա Ասոյանի արձանագրած անմխիթար վիճակին իրենք չեն արձագանքի, տնօրենը նպատակահարմար է գտել արձագանքել անձամբ: Որոշ տեղեկությունների համաձայն՝ ընկերությունը վդովված է ցուցարարներից ոչ միայն մեքենայի վրա բարձրանալու համար, այլ իրենց աղբամանները փողոցներից հավաքելու, պողոտայում բարիկադ ստեղծելու պատճառով: Նրանք համարում են, որ լուրջ նյութական վնաս է պատճառվել իրենց՝ շուրջ 40 աղբաման այնտեղ տեղափոխելով ու այս օրերին դրանք «դիտավորյալ վնասելով»: Բացի դա, ընկերությունը համարում է, որ սանիտարահիգիենիկ վիճակը պատշաճ պահելը իրենց խնդիրը չէ, իրենք էլ պետք է ավլեին՝ ինչպես ցուցարարները:
Եթե պատկան մարմինները հետևություն չեն անում երկրի գլխավոր վարակաբանի արձանագրությունից, դա նշանակում է, որ վերջինիս այցը դարձյալ ցուցարարների աչքը վախեցնելու, այդպիսով ճանապարհը բացելուն ուղղված իշխանության գործադրած մեթոդներից մեկն էր:
Նշենք, որ հունիսի 28-ին աղբամանները պողոտա տանելու, այսինքն՝ ուրիշի գույքը դիտավորյալ վնասելու, ոչնչացնելու հոդվածով հարուցվել է քրեական գործ: