Թուրքական Taraf թերթի փոխանցմամբ՝ Թուրքիան երեք ակնկալիք ունի Սիրիայի քրդերի «Դեմոկրատական միություն» կուսակցությունից (PYD), որին թուրքական կողմը համարում է Թուրքիայում ահաբեկչական հռչակված ու արգելված «Քրդստանի աշխատավորական» կուսակցության (PKK) սիրիական թև:
Թուրքիայում կարծում են, որ PYD-ը գնում է թուրք-սիրիական սահմանի երկայնքով քրդական պետություն ստեղծելու ճանապարհով: Թուրք բարձրաստիճան մի պաշտոնյա թերթին հայտնել է, որ այժմ թուրքական կողմն ակնկալում է, որ PYD-ը պետք է ձեռնարկի երեք բան: Դրանցից մեկն այն է, որ քրդերը ԴԱԻՇ-ի զինյալներից Թուրքիայի սահմանին մոտ ընկած Թել-Աբյադ քաղաքի ազատագրումից հետո նրա բնակիչները, որոնք փախել էին Թուրքիա, պետք է վերադառնան իրենց տները:
Ավելի վաղ Թուրքիայի իշխանությունները մտահոգություն էին հայտնել Սիրիայի հյուսիսում ժողովրդագրական պատկերի փոփոխման կապակցությամբ՝ Սիրիայի քրդերին մեղադրելով արաբներին ու թուրքմեններին տարածաշրջանից վտարելու համար:
Երկրորդ պահանջը վերաբերում է PYD-ի կողմից սեփական դրոշը իջեցնելուն, որը տեսանելի է Թուրքիայի սահմանից, իսկ երրորդ պահանջն առնչվում է տեղական ինքնակառվարմանը, որին թուրքական կողմի կարծիքով՝ պետք է մասնակցեն նաև մյուս էթնիկ փոքրամասնությունները:
Ընդգծվում է, որ թուրքական հետախուզությունը տվյալներ ունի, թե Սիրիայի նախագահ Բաշար Ասադը ԴԱԻՇ-ի զինյալներին «ասել» է, որ Հալեպի հյուսիսը թողնում է նրանց, և որ դա, ինչպեսև Սիրիայի հյուսիսում ԴԱԻՇ-ի հարձակման ուժգնացումը կարող են հանգեցնել նրան, որ Թուրքիա կարող է հոսել 4.5 միլիոնանոց փախստականների նոր հոսք:
Հիշեցնենք, որ ՄԱԿ-ի փախստականների հարցերով գերագույն հանձնակատար Անտոնիո Գուտիերեշն օրեր առաջ Ստամբուլում հայտարարեց, որ Թուրքիան ապաստան տված փախստականների ցուցանիշով առաջին տեղն է զբաղեցնում աշխարհում. «Մեր հաշվարկներով` ներկայումս Թուրքիայում ապաստան է գտել ավելի քան 2 միլիոն փախստական: Թուրքիան իր սահմանները բացել է սիրիացիների, իրաքցիների և աֆղանների համար»:
ՄԱԿ-ի տվյալներով` Թուրքիայում ապաստան է գտել 1.772.535 սիրիացի փախստական: Նրանցից ավելի քան 20.000-ը Թուրքիայի տարածքում հայտնվել են վերջին երկու շաբաթվա ընթացքում: Մայիսի սկզբին Թուրքիայի նախագահ Ռեջեփ Էրդողանը հայտարարեց, որ Թուրքիան սիրիացի փախստականների վրա ծախսել է 5.6 միլիարդ դոլար: