Հայաստանի ազգային հավաքականի կիսապաշտպան Արազ Օզբիլիսը հարցազրույց է տվել Sport-express-ին՝ անդրադառնալով նաև «Սպարտակ»-ի նախկին գլխավոր մարզիչ Մուրատ Յակինին, իր և Յուրա Մովսիսյանի վնասվածքներին։
«Կարծում եմ՝ Յակինն ուժեղ մարզիչ է։ Չեմ կասկածում նրա որակներին։ Նա ունի սեփական փիլիսոփայությունը, արժանիքները, գերազանց է հասկանում ֆուտբոլը։
Չեմ կարող ասել՝ ինչու նա հաջողության չհասավ «Սպարտակ»-ում, բայց վստահ եմ, որ դա կարող է անել այլ թիմում։ Այդպես պատահում է՝ ինչ-որ տեղ մարզչի մոտ ստացվում է աշխատել, ինչ-որ տեղ՝ ոչ։
Թիմի ներսում միշտ լավ մթնոլորտ է։ Այո, այն կարող է փոքր-ինչ վատանալ, եթե արդյունք չկա, բայց դա նորմալ է։ Հաղթում ես, և տրամադրությունդ բարձր է ։ Օրեցօր ինձ ավելի ու ավելի լավ եմ զգում, ծնկի վնասվածքն արդեն չի անհանգստացնում։ Ցավ չկա։
Նման վնասվածքից վերականգնվելն ավելի բարդ է, քան խաղալն ու մարզվելը։ Բայց եղել են մի շարք խաղացողներ, ովքեր երկար դադարից հետո վերադարձել են ու բարձրակարգ խաղ ցուցադրել։ Կվերադառնամ նաև ես, ինչպես արել եմ նախկինում։
Հաճախ եմ շփվում Մովսիսյանի հետ։ Նա նախկինի պես փոքրիկ անհարմարություն է զգում, և մոտ ժամանակներս մեկնելու է Հռոմ՝ անցնելու բուժզննում։ Շատ շուտով, հուսով եմ, կմիանա մեզ։ Յուրայի համար հիմա շատ բարդ շրջան է։ Նա բաց է թողնում նախամրցաշրջանային պատրաստության շատ կարևոր հատված։ Գիտեմ, որ շատ է անհանգստանում այդ կապակցությամբ»։