Այսօր Շիրակի մարզի ընդհանուր իրավասության առաջին ատյանի դատարանում շարունակվեց 2014թ. նոյեմբերի 10-ին տեղի ունեցած ավտովթարի գործով դատաքննությունը: Դատարանում ցուցմունք տվեցին գործով վկաներ Էրիկ Բալայանը, Սենիկ Համբարյանը և Արտակ Ավետիսյանը:
Գործով վկա ճանաչված Սենիկ համբարյանը նշեց, որ ինքն աշխատում է որպես կոմպրեսոր Հոռոմի խաչմերուկի մոտակայքում գտնվող գազալցակայանում: Դեպքի օրը՝ երեկոյան 7-ի մոտերքը, ինքն ու իր աշխատանքային ընկերը պատրաստվել են ընթրիքի, երբ լսել են բախման ուժգին ձայն: Դուրս են եկել ու խաչմերուկին տեսել արդեն վառվող ԳԱԶԵԼ-ը: Մոտեցել են ու փորձել օգնություն ցույց տալ, մինչ կրակի այն աստիճան ուժեղանալը, որ մոտենալն արդեն անհնար է եղել: Ապա վերադարձել են աշխատավայր ու փորձել ճշտել, թե ինչ է կատարվել ու ինչից է եղել վթարը:
Մեղադրող Արտյոմ Ավետիսյանի հարցին ի պատասխան՝ վկա Համբարյանը նշեց, որ այլ մեքենա չի տեսել, քանի որ դրսում մութ է եղել, և, բացի դրանից, իրենց աշխատավայրում իրենք մի պատուհան ունեն, որը նայում է դիսպետչերական կետին, և ճանապարհը չի երևում: Բացի դրանից՝ իրենք ունեն տեսաձայնագրող սարքեր, սակայն դրանք նայում են դեպի Մարալիկ: Պարզվեց, որ տեսաձայնագրող սարքերը քննիչի կողմից վերցվել են և ապա բավական ուշ վերադարձվել:
Գործով վկա ճանաչված Արտակ Ավետիսյանը ևս, որ Սենիկ Համբարյանի հետ է աշխատում նույն գազալցակայանում, նշեց, որ լսել են բախման ձայն և գնացել ու տեսել են վթարը և փորձել օգնել: Վերջինս նույնպես հաստատեց, որ տեսաձայնագրող սարքեր ունեցել են, սակայն այլ մանրամասներից ինքը տեղյակ չէ:
Սույն վկաների ցուցմունքներից հետո դատարանը, հաշվի առնելով, որ կան գործով վկա ճանաչված մի շարք բացակա անձինք, ովքեր քանիցս չեն ներկայացել դատալսման, որոշեց, որ դատական նիստը կհետաձգվի մինչև հուլիսի 10-ը, իսկ բացակա վկա ճանաչված անձանց համապատասխան որոշումներով ոստիկանության միջոցով բերման կենթարկեն: