Թուրքական Dünya Bülteni լրատվական կենտրոնի փոխանցմամբ՝ Թուրքիայի վարչապետ Ահմեթ Դավութօղլուն հայտարարել է, որ իր գլխավորած «Արդարություն և զարգացում» կուսակցությունը (ԱԶԿ) կոալիցիա ձևավորելու երկու տարբերակ ունի:
Դավութօղլուն մանրամասնել է, որ ԱԶԿ-ն պետք է կոալիցիա ձևավորի կա՛մ «Ժողովրդա-հանրապետական» կուսակցության (ԺՀԿ), կա՛մ «Ազգայնական շարժում» կուսակցության (ԱՇԿ) հետ: Դավութօղլուն հավելել է, որ այլ այլընտրանքներ ներկա պահին չկան:
Մեկնաբանելով Թուրքիայի խորհրդարանի նախագահի ընտրությունները՝ Դավութօղլուն հերքել է, թե ԱՇԿ-ն դրանցում աջակցել է ԱԶԿ-ին՝ հնարավորություն տալով նրա թեկնածու Իսմեթ Յըլմազին ընտրվել Թուրքիայի խորհրդարանի նախագահի պաշտոնում: Դավութօղլուն ընդգծել է, որ ԱՇԿ-ն մինչև վերջ աջակցել է իր թեկնածուին (Էքմելեդդին Իհսանօղլու) և չի աջակցել ԱԶԿ-ի թեկնածուին:
Հիշեցնենք, որ Թուրքիայի խորհրդարանի նախագահի ընտրությունների 4-րդ փուլում միմյանց հետ մրցել են ԱԶԿ-ի թեկնածու Իսմեթ Յըլմազն ու ԺՀԿ-ի թեկնածու Դենիզ Բայքալը: Քրդամետ «Ժողովուրդների դեմոկրատական» կուսակցության (ԺԴԿ) մոտ 50 պատգամավորներ իրենց քվեն տվել են Դենիզ Բայքալին, իսկ ահա ԱՇԿ-ն 4-րդ փուլում չի աջակցել որևէ թեկնածուի՝ դրանով իսկ Իսմեթ Յըլմազին անուղղակիորեն հնարավորություն տալով ընտրվել Թուրքիայի խորհրդարանի նախագահի պաշտոնում:
