Թուրքական Anadolu լրատվական գործակալության փոխանցմամբ՝ Թուրքիայի վարչապետ Ահմեթ Դավութօղլուն հայտարարել է, որ Թուրքիան ամրապնդում է Սիրիայի հետ սահմանը, սակայն մտադիր չէ մոտ ապագայում ռազմական միջամտություն իրականացնել այդ երկրում:
«Դա ճիշտ է, որ մենք ձեռնարկել ենք զգուշավորության մի շարք միջոցներ, որպեսզի պաշտպանենք մեր սահմանը: Եթե հակառակ կողմից ի հայտ գա մեր անվտանգության հանդեպ սպառնալիք, ապա կտրվի համապատասխան հրաման: Սակայն որևէ մեկը չպետք է կարծի, թե Թուրքիան վաղը կամ մոտ ապագայում մտնելու է Սիրիա»,- ասել է նա:
Դավութօղլուն հիշեցրել է, որ մայիս-հունիսին ԴԱԻՇ-ի զինյալների ու քրդական ջոկատների միջև թեժ մարտեր են ծավալվել Թուրքիայի սահմանին հարակից Սիրիայի շրջաններում, որոնք շարունակվում են նաև ներկայումս:
Ավելի վաղ հաղորդվել էր, թե Թուրքիան տանկեր և զրահատեխնիկա է կենտրոնացրել Սիրիայի հետ սահմանին, և որ մարտական պատրաստության են բերվել նաև F-16 կործանիչները: ԱՄՆ պետդեպարտամենտը քանիցս հայտարարել է, որ չի տեսնում Սիրիայի հյուսիսում անվտանգության գոտու ստեղծման անհրաժեշտություն, ինչին ձգտում է Թուրքիան: