MK-Turkey-ի փոխանցմամբ՝ քրդամետ «Ժողովուրդների դեմոկրատական» կուսակցության (ԺԴԿ) համանախագահ Սելահաթթին Դեմիրթաշը Անկարայում՝ ԺԴԿ-ի շտաբ-բնակարանում, լրագրողների հետ զրույցում հայտարարել է, որ իր կուսակցությունը պատրաստ է բանակցային սեղանի շուրջ նստել «Ազգայնական շարժում» կուսակցության (ԱՇԿ) հետ՝ Թուրքիայի խնդիրների ընդհանուր լուծումը գտնելու համար:
Դեմիրթաշն ընդգծել է, որ պատրաստ է գնալ այդ քայլին՝ չնայած ԱՇԿ-ի կողմից ԺԴԿ-ին հասցեագրած բոլոր մեղադրանքներին: «Չնայած բոլոր մեղադրանքներին՝ մեր դիրքորոշումը հետևյալն է. մենք պատրաստ ենք ԱՇԿ-ի հետ նստել բանակցային սեղանի շուրջ, որպեսզի լուծենք մեր երկրի խնդիրները, ինչպես նաև հանուն մեր քաղաքացիների:
Ինչպես դուք նկատել եք, նրանք (ԱՇԿ) բացառել ենք առանց «Արդարություն և զարգացում» կուսակցության (ԱԶԿ) մասնակցության կոալիցիայի բոլոր տարբերակները: Նրանք պայմաններ ստեղծեցին, որ ԱԶԿ-ի թեկնածուն ընտրվի խորհրդարանի նախագահի պաշտոնում: ԱՇԿ-ին յուրովի ձեռնտու է, որ ԱԶԿ-ը վերստին գերակայի Թուրքիայում»,- ասել է նա:
Դեմիրթաշը նկատել է, որ ԱՇԿ-ն չի կարող բաց կերպով հայտարարել, որ աջակցում է ԱԶԿ-ին, և դրանից ելնելով՝ սկսում է խիստ հայտարարություններ անել իրենց հասցեին, մինչդեռ իրենք շարունակելու են վարել ազնիվ քաղաքականություն և պատրաստ են ԱՇԿ-ի հետ միասին լուծել երկրի խնդիրները:
