Մոսվկայի «Դինամո»-ի և Հայաստանի ազգային հավաքականի դարպասապահ Ռոման Բերեզովսկին որոշում է կայացրել ավարտել ֆուտբոլիստի կարիերան:
40-ամյա դարպասապահը Невское время-ին տված հարցազրույցում խոսել է իր ապագայի մասին:
«Այո, ես իրոք որոշում եմ կայացրել ավարտել ֆուտբոլիստի կարիերան: Այժմ աշխատում եմ Մոսկվայի «Դինամո»-ի երիտասարդական թիմի մարզչական շտաբում: Դեռ համակերպվում եմ իմ նոր աշխատանքին: Անկեղծ, այս ամենն ինձ համար անսպասելի էր: Ծրագրում էի շարունակել հանդես գալ որպես ֆուտբոլիստ, սակայն Հայաստան-Պորտուգալիա խաղից հետո փոխեցի որոշումս:
Կարող էի տեղափոխվել Երևանի «Փյունիկ», սակայն Պորտուգալիայի դեմ խաղից հետո ցավալի մտքեր ունեցա: Ցավոք, մեր հավաքականը վերջին շրջանում թույլ արդյունքներ է ցուցադրել: Այդ վատ արդյունքների հիմնական պատճառը ես եմ եղել: Եթե իմ տեղը զբաղեցնի ուրիշը, կարող է ամեն ինչ փոխվել:
Հայաստանի ազգային հավաքականի նորանշանակ մարզիչ Սարգիս Հովսեփյանի հետ շատ մոտ եմ: Ժամանակին մենք միասին հանդես ենք եկել «Զենիթ»-ի կազմում: Այս թեմայով երկար ենք շփվել, սակայն Սարգիսը հույս ուներ, որ ես կփոխեմ որոշումս և կշարունակեմ օգնել ընտրանուն: Անկեղծ ասած, ես նույնպես չէի ցանկանում ավարտել ելույթներս հավաքականում: 19 տարեկանից հանդես եմ գալիս Հայաստանի հավաքականում և միշտ զգացել եմ երկրպագուների, թիմակիցների և մարզիչների աջակցությունը: Վստահ եմ, որ կշարունակեմ օգնել Հայաստանի ընտրանուն արդեն այլ պաշտոնում:
Տեսնենք, թե ինչպես կստացվի: Ցանկանում եմ հրաժեշտի հանդիպում կազմակերպել»,- հայտարարել է Բերեզովսկին: