Հայ գործարար Լևոն Հայրապետյանը խնդրում է լիազորությունների չարաշահման վերաբերյալ գործ հարուցել հետաքննչական խմբի ղեկավար փոխգնդապետ Ալեքսեյ Վեսելևի դեմ: Այս մասին RIA Novosti-ին հայտնել է նրա փաստաբան Ռուբեն Մարգարյանը:
Պաշտպանի խոսքով՝ «գործի նյութերից հետևում է, որ հետաքննիչ Վեսելևը 2014 թ. սեպտեմբերի 8-ին ոստիկանությանը հրահանգել է փաստաբանների նկատմամբ օպերատիվ-որոնողական միջոցառումների համալիր իրականացնել, մասնավորապես, պարզել ավտոմեքենաների տեղաշարժի երթուղին և տեղեկություններ ստանալ նրանց ունեցվածքի մասին»:
Նրա խոսքով՝ «Ռուսաստանում փաստաբանական գործունեության և փաստաբանության մասին» դաշնային օրենքի համաձայն՝ փաստաբանների նկատմամբ օպերատիվ միջոցառումների մասին որոշում կարող էր ընդունվել միայն դատարանի թույլտվությամբ, ինչը հետաքննիչը չի ստացել: «Հետաքննիչ Վեսելևը միանշանակ չարաշահել է հետաքննիչի համար նախատեսված լիազորությունները, առավել ևս, որ փաստաբանները չեն եղել գործով ո՛չ կասկածյալ, ո՛չ մեղադրյալ»,- ասել է Մարգարյանը:
«Հայրապետյանը քրեական գործի նյութերին ծանոթանալու գործընթացում հայտարարություն է տվել Ռուսաստանի հետաքննչական կոմիտեի նախագահ Ալեքսանդր Բաստրիկինի անունով հետաքննչական խմբի ղեկավարի՝ փոխգնդապետ Ալեքսեյ Վեսելևի դեմ Ռուսաստանի ՔՕ 286 հոդվածի (պաշտոնեական լիազորությունների չարաշահում) համաձայն քրեական հետապնդում հարուցելու վերաբերյալ»,- ասել է պաշտպանը:
Պաշտպանը նշել է, որ Հետաքննչական կոմիտեի Գլխավոր հետաքննչական վարչության ղեկավար Ալեքսանդր Շուկինը մերժել է ընթացակարգային ստուգում անցկացնելու Հայրապետյանի հայտարարությունը «հիմքերի բացակայության» պատճառով:
Հայրապետյանի պաշտպանները նաև մտադիր են դիմել Փաստաբանների դաշնային պալատի և Մոսկվայի փաստաբանական պալատի ղեկավարությանը՝ փաստաբանների նկատմամբ անօրինական գործողությունների, ներառյալ՝ հաճախորդի հետ փաստաբանի բանակցությունների գաղտնալսման ու ֆիքսման դադարեցման ուղղությամբ միջոցներ ձեռնարկելու խնդրանքով: