«Առաջին լրատվական»-ը ամիսը մեկ անգամ ընթերցողին հնարավորություն է տալիս իրեն հետաքրքրող հարցերով դիմել Հայաստանի Հանրապետությունում ԱՄՆ հյուպատոս Ֆրենկ Տուին, ում պատասխանները կհրապարակվեն թերթում և մեր կայքում: Հարցերը կարող են առնչվել ԱՄՆ մուտքի վիզաներին ու ԱՄՆ ուղևորություններին: Միացյալ Նահանգները Հայաստանից ժամանած այցելուներին առաջարկելու շատ բան ունի` կարող եք ծանոթանալ ԱՄՆ պատմությանը, մշակույթին, ճաշակել ամերիկյան ուտեստներն ու գինիները, տեսնել ԱՄՆ ճարտարապետությունը, լինել ծովափնյա հանգստավայրերում ու ազգային պարկերում: Կարող եք նաև ձեր հարցերն ուղարկել էլեկտրոնային փոստի` [email protected] հասցեով: Ստորև ներկայացնում ենք ԱՄՆ հյուպատոսին ուղղված մեր հարցերն ու նրա պատասխանները:
Ողջույն, ես Ֆրենկ Տուն եմ, Հայաստանում ԱՄՆ հյուպատոսը: Ամեն ամիս ես պատասխանում եմ ԱՄՆ մուտքի վիզաների ու ներգաղթային գործընթացների վերաբերյալ ձեզ հետաքրքրող հարցերին: Շնորհակալ եմ ձեր ուղարկած հարյուրավոր հարցերի համար: Խնդրում եմ հարցն ուղարկելիս ներառել նաև ձեր էլեկտրոնային փոստի հասցեն, որպեսզի այս թողարկումներում ձեր հարցին անդրադառնալու հնարավորություն չունենալու դեպքում, իմ գրասենյակը ուղղակիորեն պատասխանի ձեզ:
Վիզաների հետ կապված հարցերը պարզ ու հասարակ չեն, երբեմն մենք արտառոց իրավիճակներում ենք հայտնվում: Այսօր կուզենայի անդրադառնալ նման իրավիճակներին վերաբերող հարցերին:
Վերջերս համակարգերի հետ կապված տեխնիկական խնդիրներ ունեցանք, որոնք անդրադարձան աշխարհում ԱՄՆ մուտքի վիզաների ու օտարերկրյա անձնագրերի թողարկման համակարգերի վրա: Խնդիրը չէր սահմանափակվում վիզայի մի քանի տեսակներով կամ մի քանի երկրով: Մենք հայցում ենք ԱՄՆ ուղևորվողների ներողամտությունը և ուզում եմ շեշտել, որ, մեր սահմանների պաշտպանությունն ապահովելով հանդերձ, մենք ամեն ինչ անում ենք օրինական ուղևորությունները դյուրացնելու համար: Թեպետ համակարգում տեղ գտած խնդիրների պատճառով վիզայի որոշ հարցազրույցներ չեղարկվել են, մենք հարցազրույցի հավելյալ տեղեր ենք հատկացրել, նաև մեր սովորական աշխատանքային ժամերից դուրս:
Հարց. Ինչպե՞ս է սա անդրադառնում վիզայի ընթացակարգերի վրա: Հնարավո՞ր է վիզան տպել առանց այդ համակարգի:
Համակարգերը, որոնց միջոցով մենք անցկացնում ենք պահանջվող ստուգումներ ազգային անվտանգության հարցերի հետ կապված, այս պահին տեխնիկական խնդիրներ ունեն: Արդյունքում, մենք չենք կարող տպել վիզաներ: Մենք չենք կարող շրջանցել նախքան վիզայի տրամադրումը կատարվելիք ստուգումների վերաբերյալ օրենքի պահանջները: Եթե տվյալների համակարգերի հետ կապված այլ հարցեր ունեք, կարող եք այցելել դեսպանության կայքը:
Հարց. Գրին քարտի խաղարկությանը գրանցվելու հայտում սխալ է թույլ տրվել. ազգականս իմ անունից լրացված գրանցման հայտում չի ներառել երեխայիս: Ինչպե՞ս կարող եմ ուղղել այդ սխալը: Հնարավոր՞ է, որ դա մերժման պատճառ դառնա:
Ցավոք, գոյություն ունեցող երեխային կամ ամուսնուն/կնոջը հայտում չներառելը ավտոմատ կերպով հանգեցնում է ներգաղթային վիզայի մերժման: Այդ սխալն ուղղել հնարավոր չէ և կարևոր է հիշել, որ այդ հիմքով մերժման մասին դուք կկարողանաք իմանալ միայն այն բանից հետո, երբ կատարել եք ներգաղթային վիզայի համար պահանջվող վճարումները, որոնք վերադարձման ենթակա չեն: Կրկին ու կրկին ուզում եմ շեշտել, որ գրանցման հայտում անպայմանորեն պետք է նշել 21 տարին չլրացած ու չամուսնացած բոլոր երեխաներին՝ անկախ այն հանգամանքից նրանց ձեզ հետ են ապրում կամ պատրաստվում են ԱՄՆ մեկնել, թե ոչ: Երեխա ասելիս նկատի ունենք կենսաբանական երեխաներին, որդեգրած երեխաներին և խորթ երեխաներին:
Գրանցման դիմումը ներկայացնելուց հետո ծնված երեխան որևէ խնդիր չի առաջացնում և կարող է ավելացվել ներգաղթային վիզայի հիմնական դիմումին:
Հարց Ա. Գագարովից. Ես փախստական եմ և գտնվում եմ Հայաստանի Հանրապետությունում: Ինչպե՞ս կարող եմ որպես փախստական ստանալ ԱՄՆ ներգաղթային վիզա:
Շնորհակալություն այս հարցի համար, պ-ն Գագարով: Տեղյակ եմ, որ Հայաստանում կան շատ փախստականներ ու լիովին հասկանում եմ ձեր դրությունը: Ձեր հարցը պարզ է, բայց այս հարցին կարելի է մի քանի ձևով պատասխանել: Նախ, ԱՄՆ ներգաղթային վիզաներ տրվում եմ միայն այն անձանց, ովքեր ունեն ԱՄՆ-ում գտնվող ընտանիքի անդամներ կամ գործատու: Եթե կա ընտանիքի անդամ կամ գործատու ԱՄՆ-ում, որը ձեզ համար միջնորդագիր է ներկայացնում ներգաղթային վիզայի համար, ապա այդ պարագայում փախստականի կարգավիճակը որևէ նշանակություն չունի:
Երկրորդ, «փախստականի կարգավիճակով» ԱՄՆ ում հայտնվելու համար ձեզ անհրաժեշտ կլինի «ուղեգիր» դեպի Փախստականների ընդունման ԱՄՆ ծրագիր (USRAP): Այն Հայաստանում գրասենյակ չունի: Փախստականների ընդունման ԱՄՆ ծրագրի ուղեգրեր սովորաբար տրվում են Փախստականների հարցերով ՄԱԿ-ի գլխավոր հանձնակատարի վերաբնակեցման ճամբարների կամ իրավասու հասարակական կազմակերպությունների կողմից: Ինչքանով տեղյակ եմ՝ Փախստականների հարցերով ՄԱԿ-ի հանձնակատարը Հայաստանում վերաբնակեցման ճամբար չունի:
Կարևոր է նաև նշել, որ ԱՄՆ ներգաղթային օրենսդրության համաձայն այն անձը, ով հեռացել է իր երկրից ավելի բարեկեցիկ կենսապայմաններ գտնելու համար, չի համարվում փախստական. այս մարդիկ հայտնի են նաև որպես տնտեսական միգրանտներ: ԱՄՆ օրենսդրության համաձայն փախստականների վերաբնակեցման ծրագրում չեն կարող ներառվել այն մարդիկ, ովքեր քաղաքացիական պատերազմի կամ տարերային աղետների հետևանքով են փախուստի դիմել իրենց բնակավայրերից:
Շնորհակալություն հարցերի համար, շարունակեք գրել մեզ և մենք սիրով կանդրադառնանք ձեր հարցերին մեր հաջորդ թողարկումներում:
