Իրանական Mehr լրատվական գործակալության փոխանցմամբ՝ Իրանի փոխարտգործնախարար Աբբաս Արաղչին հայտարարել է, որ Իրանը ձգտում է իր միջուկային ծրագրի շուրջ «վեցյակի» հետ համաձայնագրին, սակայն պատրաստ չէ դրա համար վճարել ցանկացած գին։
«Վիեննայում բանակցություններին մասնակցող բոլոր պատվիրակությունները, այդ թվում նաև իրանականը, դրական մթնոլորտում ու շատ լրջորեն աշխատում են ապագա համաձայնագրի տեքստի վրա: Բանակցությունների ժամանակ տիրում է առաջընթացի ոգի:
Իրանի համար լավ գործարքն այն է, որը հարգում է երկրի ղեկավար, այաթոլլահ Ալի Խամենեիի սահմանած սկզբունքներն ու շրջանակները: Իրանը շատ բան է պահանջում, սակայն դա լիովին արդարացված է, քանի որ նա նաև շատ բան է տալիս, և այդ հարաբերակցությունը հավասարակշռված է: Մենք ի սկզբանե հայտարարել ենք կոշտ պատժամիջոցների չեղյալ հայտարարման անհրաժեշտության մասին»,- նշել է նա:
Հիշեցնելով, որ բանակցությունների ժամկետը երկարաձգվել է մինչև հուլիսի 7-ը՝ Արաղչին հույս է հայտնել, որ կհաջողվի համաձայնագրին հասնել շաբաթվա ընթացքում:
