Սեփական տուն կամ բնակարան ունեցողների թվով, 2013թ. տվյալներով, ԵՄ առաջատարը Ռումինիան է՝ հայտնում է news.rambler.ru-ն:
Այդ երկրի բնակիչների 96%-ը սեփական տուն ունի, միայն 4%-ն է վարձակալում: Հաջորդում են Լիտվան (92%) և Սլովակիան (91%): Լեհաստանը 7-րդ տեղում է (84%), Իսպանիան՝ 12-րդ (78%), Իտալիան՝ 18-րդ (73%):
Մեծ Բրիտանիան 24-րդ տեղում է (65%), Ֆրանսիան՝ 25-րդ (64%): Ցուցակը եզրափակում է Գերմանիան, որտեղ սեփական տուն ունի բնակիչների 53%-ը:
ԵՄ երկրների քաղաքացիների 70%-ը սեփական տուն ունի, 30%-ը վարձակալում է՝ ասվում է ֆրանսիական Credit Foncier բանկի հետազոտության մեջ:
Հետազոտության հեղինակները նշում են, որ Արևելյան Եվրոպայի երկրներում սեփական տուն ունեցողների բարձր թիվը (միջինը 87%) բացատրվում է 1990-ական թթ. զանգվածային սեփականաշնորհման ալիքով: Իսկ Գերմանիայում սեփականատերերի և վարձակալների գործնականում հավասար թիվը բացատրվում է պատմական պատճառներով և հարկային քաղաքականությամբ, որը խթանում է բնակարանի վարձակալության և վարձով տալու պրակտիկան:
Հիպոթեքային վարկերի պարտքի ամենամեծ ծավալը Դանիայում է (189.800 եվրո 1 տնտեսության հաշվով): Հաջորդը Լյուքսեմբուրգն է (154.000 եվրո) և Շվեդիան (81.200 եվրո): Մեծ Բրիտանիան 4-րդն է (78.000 եվրո), Ֆրանսիան՝ 8-րդը (50.000 եվրո), Գերմանիան՝ 9-րդը (49.300 եվրո): Ամենաքիչ հիպոթեքային վարկերը Ռումինիայում են (1500 եվրո):