Վրաստանում աշնանը էլեկտրաէներգիայի սակագինը հնարավոր է՝ բարձրանա: Ոլորտի մասնագետները նշում են, որ դա անխուսափելի է: Հանրությունը դուրս կգա փողոց, թե ոչ՝ Վրաստանի դիվանագիտական ակադեմիայի ռեկտոր, քաղաքագետ Սոսո Ցինցաձեն «Առաջին լրատվական»-ի հետ զրույցում դժվարացավ ասել:
Նա ընդգծեց, որ նույն «ԻՆՏԵՐ ՌԱՕ ԵԷՍ»-ի հետ Վրաստանը բավականին արդյունավետ է աշխատում:
«Իմ կարծիքով՝ այստեղ կարևոր դեր է խաղում քաղաքականությունը: Ինչ խնդիր էլ ծագած լինի՝ հայ ժողովուրդը Ռուսաստանից ավելի լավ պայմաններ պահանջելու իրավունք ունի: Մենք մեր արևմտամետ քաղաքական կուրսով բավականին լավ աշխատում ենք և խնդրի դեպքում էլ իրավունք չունենք Ռուսաստանից հավելյալ արտոնություններ պահանջելու: Հայ ժողովուրդն իսկապես իրավունք ունի, որովհետև Հայաստանը ԵՏՄ, ԱՊՀ, ՀԱՊԿ անդամ է՝ Հայաստանն ու Ռուսաստանը դաշնակից են, ուրեմն պետք է օգնեն միմյանց»,- ասաց Ցինցաձեն:
Նա ավելացրեց, որ եվրոպական երկրներում նույնիսկ 2 տոկոսով տարիֆները բարձրացնելու դեպքում հանրությունը դուրս է գալիս փողոց. «Հիմա, իմ կարծիքով, հայ չինովնիկները պետք է կամ ապացուցեն, որ այլ ելք գոյություն չունի, այլընտրանք բացարձակապես չկա, կամ էլ չեղարկեն որոշումը:
Կաբինետներում լուռ նման որոշում կայացնել, որի արդյունքում ժողովուրդն այդքան շատ պետք է վճարի՝ անթույլատրելի է: Այդ որոշումն ընդունվել է առանց ժողովրդի հետ երկխոսության, առանց խորհրդակցության»։
Սոսո Ցինցաձեն ավելացրեց, որ Վրաստանում իրավիճակը մի փոքր այլ է. «Մինչև հիմա մեր չինովնիկները հետ են պահում նման քայլից: Նրանք հիմա չեն կարող գնալ այդ քայլին, որովհետև առանց այն էլ սոցիալական վիճակը լարված է. «Վրացական երազանք»-ի տված խոստումները հենց այդպես երազանք էլ մնացին, այդ պատճառով էլ մենք առայժմ խուսափում ենք թանկացումից»:
Քաղաքագետի խոսքով՝ այս օրերին հայ երիտասարդները շատ մեծ գործ արեցին, և առանց այսպիսի կտրուկ քայլերի հնարավոր չէր լինի գոնե կես հաղթանակ գրանցել. «Այստեղ կամ չինովնիկների ագահությունն է խոսում, կամ ոչ պրոֆեսիոնալիզմը, վատ մենեջմենթեը: Հայ ժողովուրդն էլ որոշեց՝ ձեր սխալների, ձեր վատ աշխատանքի համար մենք չենք վճարելու։ Խոնարհվում եմ հայ երիտասարդության առաջ»,- եզրափակեց նա:
