«Այս տարի Հայաստանի տնտեսությունը կարձանագրի շատ քիչ աճ, հավանաբար այս տարի ընդհանրապես չաճի: Բայց հուսով եմ, որ մենք սխալ կլինենք: Միգուցե տարին մի փոքր դրական ավարտվի, քան թե զրոյական աճն է, բայց չափը համեստ է լինելու: Մյուս տարի էլ մենք աճի տեմպերի մեծ աճ չենք տեսնում»,- այսօր լրագրողների հետ հանդիպման ժամանակ հայտարարեց Արժույթի միջազգային հիմնադրամի Մերձավոր Արևելքի և Կենտրոնական Ասիայի վարչության տնօրեն Մասուդ Ահմեդը՝ անդրադառնալով Հայաստանի տնտեսական զարգացումներին:
Նա հիշեցրեց, որ Հայաստանը շարունակում է կրել 2009թ. համաշխարհային ֆինանսատնտեսական ճգնաժամի հետևանքները և կրում է Ռուսաստանի տնտեսական ճգնաժամի բացասական ազդեցությունը, արտաքին փոխանցումների կամ արտահանման նվազումը: Մ. Ահմադի խոսքերով, եթե Հայաստանում ցանկանում են տնտեսական զարգացում ապահովել, ապա պետք է մեծ չափի ներդրումներ ներգրավվեն: Ընդ որում՝ ներդրումները պետք է լինեն ներքին միջոցների հաշվին: Եվ պետք է վերացնեն այն խնդիրները, որոնք խոչընդոտում են փոքր ու միջին բիզնեսի աշխատանքն ու ներդրումներ կատարելը:
Մ. Ահմադը կարևոր համարեց Հայաստանում աշխատատեղերի ստեղծումը հատկապես երիտասարդների համար, որպեսզի նրանք իրենց ապագան տեսնեն մեր երկրում: Նրա խոսքերով՝ Հայաստանի նման փոքր տնտեսություն ունեցող երկիրն իր զարգացման համար պետք է կարևորի նաև մրցունակությունը: Նա նաև ավելացրեց, որ ՀՀ իշխանությունները պետք է ուշադրություն դարձնեն տարածաշրջանի հետագա զարգացումներին՝ մասնավորապես Իրանի նկատմամբ պատժամիջոցների վերացումը կարող է հանգեցնել դեպի Հայաստան կապիտալի հոսքին, ինչը կարող է դրական լիցք հաղորդել ՀՀ տնտեսությանը:
Մ. Ահմադը չգիտեր, թե այդ ինչ ծրագրեր են իրականացնում Հայաստանի իշխանությունները, որոնք երկրորդ կիսամյակին տնտեսական աճի պետք է հանգեցնեն, ինչպես երբեմն հայտարարում է վարչապետ Հովիկ Աբրահամյանը կամ էկոնոմիկայի նախարար Կարեն Ճշմարիտյանը: Այստեղ իր գործընկերոջը օգնության հասավ ԱՄՀ-ի հայաստանյան առաքելության ղեկավար Մարկ Հորթոնը: Նա լսել էր, որ դպրոցաշինության, ճանապարհաշինության և փոքր ձեռնարկություններին որոշակի վարկային ֆինանսավորման արդյունքում են ՀՀ իշխանություններն ակնկալում այդ աճը:
ԱՄՀ պաշտոնյաներն անդրադարձան նաև այս օրերին էլեկտրաէներգիայի թանկացման պատճառով ընթացող բողոքի ակցիային ու Հայաստանի էներգետիկ ոլորտին: Մ. Հորթոնը անդրադարձավ էներգետիկ ոլորտների մասնավորեցման գործարքներին ու մտահոգություն հայտնեց, որ այդ գործարքների մեջ եղել է «պարքը կապիտալով փոխանակում»: «Դա իրականում չի համարվում վաճառք, որի արդյունքում կգար ներդրում, և մրցութային կարգով կընտրվեր լավագույն հատկանիշների համար»,- ասաց Հորթոնը:
Վերջինս հավանաբար հիշեցնում էր «ՀայՌուսգազարդի» վերջին 20 տոկոս բաժնեմասը ռուսական «Գազպրոմ» ընկերությանը փոխանցելու գործարքը: ՀՀ իշխանություններն այդ մասը ռուսներին տվեցին գազի դիմաց կուտակած 300 մլն դոլար պարտքի համար: Եվ այդ ժամանակ ՀՀ հասարակության համար պարզվեց, որ Ռուսաստանը Հայաստանին մատակարարվող գազը թանկացրել էր, բայց մեր իշխանություններն այն գաղտնի էին պահել: «Այսինքն՝ մատակարարին պարտքի դիմաց կապիտալ տալը կարող է ոչ թափանցիկ գործարք համարվել»,- եզրափակեց Հորթոնը: