Եգիպտոսի նախագահ Աբդել Ֆաթահ աս-Սիսին երեքշաբթի օրը խոստացել է փոփոխություններ անել քրեական օրենսդրական համակարգում, որոնք հնարավորություն կտան արագացնել ահաբեկչության համար դատապարտվածների մահապատիժների իրագործումը: Այս մասին հայտնում է RIA Novosti-ն:
Երեքշաբթի առավոտյան Եգիպտոսի նախագահը և կառավարության բարձրաստիճան պաշտոնյաներ մասնակցել են նախօրեին ահաբեկչության հետրևանքով զոհված՝ երկրի գլխավոր դատախազ Հիշամ Բարաքաթի հրաժեշտի արարողությանը:
«Արդարադատության իրագործումը կապված է մեծաթիվ օրենքների հետ: Մենք փոփոխություններ կանենք այդ օրենքներում, որոնք մեզ հնարավորություն կտան արդարադատությունն ամենակարճ ժամկետներում իրագործել»,- ասել է աս-Սիսին սգո արարողության ընթացքում ելույթի ժամանակ: Օրենսդրության մեջ փոփոխություններ կարվեն առաջիկա օրերին, խոստացել է նա:
«Մենք 5-10 տարի չենք սպասի, որ դատենք մարդկանց, որոնք մեզ սպանում են: Բոլոր վճիռները՝ լինեն ցմահ ազատազրկում, թե մահապատիժ, պարտադիր կիրագործվեն»,- հավելել է աս-Սիսին: