Աշխարհի 400 ամենահարուստ մարդիկ երկուշաբթի օրը համաշխարհային ֆոնային շուկաների անկման պատճառով կորցրել են ընդհանուր 70 մլրդ դոլար: Այս մասին վկայում են Bloomberg գործակալության ուսումնասիրությունները:
Աշխարհի այդ 400 ամենահարուստ մարդիկ միասին վերահսկում են 4,2 տրլն դոլար:
Bloomberg Billionaires Index-ի միլիարդատերերի վարկանշային ցուցակի համաձայն՝ միջին կորուստները կազմել են 175 մլն դոլար մեկ մարդու հաշվով, բայց իրականում վնասը հավասարաչափ չի եղել: Իսպանացի միլիարդատեր Ամանսիո Օրտեգան, որը համարվում է Եվրոպայի ամենահարուստ մարդը, ամենամեծ կորուստն է ունեցել՝ 2,2 մլրդ դոլար: 67,1 մլրդ դոլար կարողություն ունեցող ամերիկացի ներդրող Ուորեն Բաֆետի վնասը կազմել է 1,6 մլրդ դոլար: Մոլորակի ամենահարուստ մարդը՝ Բիլ Գեյթսը, զրկվել է 1,4 մլրդ դոլարից:
Միևնույն ժամանակ Աֆրիկայի ամենահարուստ մարդը՝ նիգերիացի միլիարդատեր Ալիկո Դանգոտեն, 12 միլիարդատերերից մեկն է, որոնց հաջողվել է ավելացնել իրենց կարողությունը: Երկուշաբթի օրը նա հարստացել է 180 մլն դոլարով, նրա կարողությունը հասել է 15,3 մլրդ դոլարի:
Երկուշաբթի օրը՝ հունիսի 29-ին, համաշխարհային ֆոնդային բորսաները կտրուկ անկում են գրանցել Հունաստանի հնարավոր դեֆոլտի և եվրագոտուց դուրս գալու հետ կապված մտավախությունների ֆոնին: Մասնավորապես, S&P 500-ի ինդեքսը նվազել է 2,1%-ով, NASDAQ-ինը՝ 2,4%-ով, եվրոպական Euro Stoxx-ինը՝ 4,2%-ով, Shenzhen Composite Index-ինը՝ 6,1%-ով:
