Հայոց ցեղասպանության 100-րդ տարելիցից մոտ 2 ամիս անց զանգվածային սպանություններից վերապրածների հարազատներն այժմ պայքարում են՝ կանխելու իրենց սիրելիների գերեզմանների արտաշիրիմումը, որի նպատակը լիբանանյան Բիբլոս առափնյա քաղաքում շքեղ առողջարանային վայրի կառուցումն է։ Այս մասին հայտնում է Beirut Report-ը։
Ոստիկանության ուղեկցությամբ բանվորների մի խումբ երկուշաբթի առավոտյան ժամանել է պատմական գերեզմանոց և սկսել փորել գերեզմանները, սակայն դա դադարեցվել է Ցեղասպանությունից վերապրածներից մեկի հարազատների կողմից դատարան ներկայացված հայցով արագ կայացված վճռով։ Հարազատները մարտին բողոք էին ներկայացրել այն բանից հետո, երբ առաջին անգամ հայտարարվել էր նախագծի մասին, դատավորը գործով հետաքննություն էր սկսել։ Չնայած ընթացքի մեջ գտնվող հետաքննությանը, երեկ փորելու փորձ է կատարվել՝ ասել է Վարդան Ավագյանը՝ Հակոբ Ավագյանի թոռը։ Հակոբ Ավագյանը ծնվել է 1894 թվականին Թուրքիայում և եղել է Լիբանանում հաստատված՝ Ցեղասպանությունից վերապրածներից մեկը։
Բանվորների հայտնվելուն պես նրանք ծանուցել են դատավորին, ով հրամայել է ժամանակավորապես դադարեցնել աշխատանքները, մինչ հետաքննության ավարտը։ Չնայած այս միջամտությանը՝ Ավագյանն անհանգստացած է շշուկներից, թե առաջիկայում ծրագրվում է արտաշիրիմման երկրորդ փորձը։
Մարտին Ավագյան կրտսերը հայտնել էր, որ հայկական եկեղեցին, որի ենթակայությամբ է գտնվում գերեզմանոցը, ըստ երևույթին, գործարք է կնքել ծովափնյա գույքի վարձակալության վերաբերյալ։
Մտավախություն կա, որ եկեղեցու շենքը, որը Լիբանանում հայկական հնագույն եկեղեցիներից մեկն է, կարող է կիրառվել որպես սպա կենտրոն կամ ռեստորան ապագա առողջավայրի համար, որը, ըստ տեղեկությունների, կապ ունի հեռահաղորդակցական հարցերով նախկին նախարար Ժան-Լուիս Քորդահիի հետ։
1900-ականների սկզբներին տեղանքը, որը հայտնի էր որպես «Թռչնի բույն», եղել է հոլանդական միսիոներական որբանոցի և դպրոցի մաս, որն ապաստան է տվել բազմաթիվ վերապրածների և ավելի ուշ դարձել է Լիբանանի վաղ հայկական համայնքներից մեկի խարիսխը։
Ավագյանը հաստատել է, որ գերեզմանոցի գույքը գտնվում է պետության Հնությունների հարցերով վարչության իրավասության տակ։ Հետևելով Ավագյանի պնդմանը, թե վարչությունն իրավասություն ունի գերեզմանոցի վրա, դատավորը պատվիրել է դադարեցնել արտաշիրիմման աշխատանքները, մինչև վարչությունը հստակեցնի դիրքորոշումը։
Եկեղեցին հայտարարել է, որ մարմինները կտեղափոխվեն ափից հեռու գտնվող նոր սրբավայր, սակայն վայրը կծառայի որպես զանգվածային գերեզմանոց։
