Ռուսաստանցի քաղաքական վերլուծաբան Վադիմ Դուբնովի խոսքերով՝ Հայաստանում «Մայդան» տեղի չի ունենա:
Նա «Առաջին լրատվական»-ի հետ զրույցում կարծիք հայտնեց, որ ի վերջո ստեղծված իրավիճակին որոշակի փոխզիջում կգտնվի, և արյունահեղություն չի լինի:
Վադիմ Դուբնովի խոսքով՝ «Ոչ թալանին» նախաձեռնության ամենառադիկալ ներկայացուցիչներն իրենց պահանջներն ամբողջությամբ չեն ձևավորել. «Իմ կարծիքով՝ դրա մեղավորը ոչ թե այդ երիտասարդներն են, այլ ինքնին ստեղծված իրավիճակը»:
«Այնքան էլ հասկանալի չէ՝ ում են ուղղված պահանջները: Պահանջել իշխանություններից՝ այս իրավիճակում անիմաստ է, նա չի կարող այդ հարցը լուծել: Պահանջ ներկայացնել Ռուսաստանին՝ էլ ավելի անիմաստ է: Պահանջ ներկայացնել Հայաստանի իշխանություններին, որ նրանք ճնշում գործադրեն այս հարցում Ռուսաստանի վրա՝ նույնպես ոչ իրատեսական է»,- ասաց մեր զրուցակիցը:
Վադիմ Դուբնովն ընդգծեց, որ որոշ չափով Մոսկվան կարող է այդ կորուստները փոխհատուցել՝ վարկեր տրամադրելու տեսքով, ինչը, սակայն, Հայաստանի տնտեսության համար օգտակար չի լինի. «Կարծում եմ՝ որոշ ժամանակ անց այս իրավիճակը կհանդարտվի ամեն դեպքում: Ես չեմ կիսում այն տեսակետները, թե Հայաստանում Մայդան կամ գունավոր հեղափոխություն է լինելու: Երեկ բավականին լարված երեկո էր Բաղրամյան պողոտայում. կարծում եմ՝ հավաքը ցրելը հիմա միանգամայն անտրամաբանական կլինի»,- ասաց նա:
Դուբնովն ասաց, որ իշխանությունները ուժային մեթոդների դիմելու մշտական գայթակղության մեջ են, բայց եթե ուժային մեթոդ կիրառվի, ապա բավականին դժվար կլինի կանխատեսել, թե դրան ինչ կհաջորդի:
Մեր զրուցակիցն ընդգծեց նաև, որ ռուսական լրատվամիջոցներն այս ամենին տալիս են «Մայդան» անունը հոգեբանական որոշակի ճնշում գործադրելու համար. «Դա պարզապես շարժման անդամների վրա ճնշում է հակառուսական լոզունգներից խուսափելու համար: Իհարկե, ոչ մի Մայդան չի լինի՝ սա սոցիալական բունտ է։ Բնականաբար, դրա տակ կան նաև քաղաքական պահանջներ ու ենթատեքստեր»: